Аьралитурал суратирттачIа тIутIивгу дирхьуну, миннал аьпа­лун минутIрайсса пахъ багьаву баян бунни Республикалул БакIчинал.

«Дагъусттаннал аьралитурал ккаккан бунни цукунсса уссарив Аьрасатнал саллатI. Жула оьрчIал жанну дуллунни, билаятран нигьачIаву дусса душманнайн данди бавцIуну. Цала аьрали бурж вайннал, фашизмалущал талай бивкIсса ттаттахъал кунма, къучагъну барт­бивгьунни. Исват дунни ирсирай нанисса жула халкьуннал виричушиву. Вай жунма абадлий дакIний бикIантIиссар. Жу зул чIарав буссару, зун жущава шайсса кумаг бантIиссар», – увкунни Сергей Меликовлул аьралитурал гъанчунахь. Ванал бувсунни Украиннал аьрщарай жанну дуллусса аьралитурал кулпатирттан кумаг бансса фонд сакин бантIишиву, республикалул бюджетрава фондравун 50 млн бичинтIишиву.

– Щак бакъар фондравун арцу дичинсса чумартсса, дакI цIуцIисса инсантал букканшиврий.
Фондрава гьарица кулпатран ца миллион булунтIиссар. Аьра­литурал кулпатру, оьрчIру, гъан-маччами жул аякьалува къабуккантIиссар, – увкунни Республикалул БакIчинал. Ванал тапшур бунни властьрал органнайн аьралитурал кулпатир­ттал масъалартту щаллу бавриву гьурттушинна дан.