Республикалул шагьрурдал ва районнал идарарттал зузалт чялишну гьуртту хьунни ххуллункьинисса субботникирттай. Ва кьини ЦIуминалийсса ЦIуссалакрал райондалул шяраваллавугу дунни субботникру.

ЧIявусса инсантал гьуртту хьусса, хъуннасса лагрулул субботник дунни ЦIуссаккуллал шяраву. Субботникрайн бувккунни шяраваллил жямат, идарарттал ва администрациялул зузалт. ЦIуссаккуллал шяраваллил бакIчи Баграт МахIаммадовлул хIадур дурну дия даврил план. Цинявппа цачIун хьуну, марцI буккан бунни тIабиаьтрал апатIирттая бивсса зараллу хьусса кIанттурду: лази-лакьи бунни идарарттал лагма-ялттусса кIанттурду, марцI бунни цинявппа ххуллурду, кIяла дунни мурхьирдал ухру.
Мартрай гужсса гъараллу лачIлай, шяраву хIасул хьуну диркIсса тагьардануцIун бавхIуну, субботникру ччя-ччяни дуллансса хIукму бунни ЦIуссаккуллал жяматрал.
Шиккува кIицI лаган, ЦIуссалакрал райондалул школардай ва идарарттай ччя-ччяни дайссар тIабиаьт дуруччаврил цIанийсса субботникру ва экологиялул акциярду.
Давуртту къуртал дурну махъ, субботникрай гьуртту хьусса зузалтрахь барчаллагь увкунни Баграт МахIаммадовлул.
– Бургияра цуксса тIааьнну бурив лагма-ялттусса кIанттурду марцI бувну, низамрайн бувцуну махъ. Хъунмасса барчаллагь тIий ура давривух хIала бувхсса цинявппагу инсантурахь. КIицI лаганна, архIал зий, субботникру дуллай халкьуннал дянивсса нахIу-хIалимшиву хъиннура цIакь шайшиву», – увкунни ванал.
ЦIуссалакрал райондалий уттигу найнна дуссар Ххувшаврил 81 шинан хас дурсса субботникру.

Имара Саидова