Ххаллилсса, дакIний личIансса мероприятие хьунни уттигъанну Москавлив, Н.И. Пироговлул цIанийсса медициналул университетраву. Шикку мадара шиннардил хьхьичIра Дагъусттаннаясса студентътурал сакин дурну дур цала вакилхана (землячество). Чансса бакъар Пироговлул цIанийсса университетраву лакрал студентъталгу. Миннал сипталий ва сакиншиннарай ва кьини шикку хьунни лакку мазран хас дурсса шадлугърал мероприятие.

Мероприятиялийн оьвкуну бия «Дагестан» Москавуллал культуралул центрданул президент Арсен ХIусайновлуйн, мунал хъиривчу Аьйшат Ма­хIаммаднуровнайн, Москавлив­сса жула оьрчIахь лакку мазрал дарсру дихьлахьисса Ххадижат ЦIаххаевайн, ММОЛ «Лакия» ккурандалул вакилтурайн. Бия цIанасса ва хьхьичIсса шиннардий вакилханалул каялувчиталну бивкIмигу. Университетрал актовый зал щап куну бувцIуну бия. Мероприятие дайдирхьуна лакрал гимнрайну.

Студентътурал бувна лакрал тарихрая, миллатрал вирттаврая бусласисса ихтилатру, бувсуна лакрал аьдатирттая, багьу-бизулия. Ккаккан дурна душ була учин, кIисса лаххан лагайсса аьдат. Мукунна ккаккан дурна жула къавтIавуртту, бувккуна шеърирду, увкуна балайрду. Мероприятие сакин дан ва лавайсса даражалий тIайла дуккан х1арачат бувна Камила Исакьовал (Ваччи-Т1улизун), Рамазан ХIабибуллаевлул (ЧIяйми-Уручул), ПатIима Къу­шие­вал (ГьунчIукьат1и), Х1урия Мах1аммадовал (Ккул), Гьидаят Оьмаровал (Гьуйми).

Ххадижат ЦIаххаевал (университетрал студентътураву ваничIан лакку мазрал дарсирдайн заназиссагу чансса бакъая) бувккуна ниттил мазран хас бувсса ва лакрал жагьилтурахасса цила шеърирду. Арсен Буйдалаевичлул бувсуна «Дагестан» МЦК-лул тарихрая, дурсса давурттая. Мероприятиялул сакиншинначитурахь, цинявппагу студентътурахь дакIнийхтунусса барчаллагьгу увкуну, Центрданул дуллалисса давурттаву чялишсса гьурттушинна дуллалисса студентътуран ванал буллуна Барчаллагьрал чагъарду. Ахирданий цинявппа бавтIуна лакку дукрардал ссупралухун. Ши­кку дия бартри, бакъухъ, натIухI, буркив, чуттурду ва цаймигу жула нахIу дукрарду. Университетрал кьини дарцIуну дия лакрай.

Мероприятие ларгуна лахъа-хъунну, сийлий. Рязину ливчIуна цивппа студентъталгу, хъамалгу.

Андриана Аьбдуллаева