Августрал 18-нний Шахьуйннал шяраваллил жяматрал кIицI ларгунни Шяраваллил Кьини.
Муний гьуртту хьунни гъинтнил гьантри шяраву гьан буван бувкIсса жагьи-жугьулт, оьрмулул бугьарами, мюрщи оьрчIру. БатIаву хьунни «Шахьуйми» фондрал чIарав бацIаврийну.
Бадрижамал Аьлиева
Шяраваллил хьхьичIсса майданнив, личIи-личIисса оьрмулул шиннал инсантурал дянив, хьунни спортрал личIи-личIисса журардал бяст-ччаллу. ХьхьичIун ливчуми лайкь хьунни дипломирттан, медаллан, бахшиширттан. Бахшиш дакъа цаягу гьурттучи къаливчIунни. Дуллалисса бахшиширттавух дия Шахьуватусса художница, Дагъусттаннал Художествалул училищалул муаьллим Аьйшат МахIаммадовал дирхьусса шяраваллил суратру дусса магнитру ва брелокругу. Бахшишру дуллай бия Руслан ХIасанов ва Кирамуттин Аьлиев. ЛичIиссара бахшишран лайкь хьунни чIиви йог Чавтара Кьурбанов.
Гихунмай тарихрал элмурдал доктор, профессор АхIмад Кьурбановлул каялувшиндаралу хьунни шяраваллил тарихийсса ва культуралул кIанттурдайнсса экскурсия. Мунил лахъишиврий жагьилтуран, хIатта оьрмулул хъуниминнангума, кIул хьунни шяраваллил тарихравасса цIу-цIусса, цанма уттинин къакIулну бивкIсса затру.
АхIмад Жабраиловичлул каялувшиндарайсса группа бивунни шяраваллил хIатталлив, ххал бунни цимирагу аьсрулул хьхьичIва бацIан бувсса кIалабарзру, ххал бунни Шагьумилавл чару (щамхалтурал лишандалущалсса), бивунни хьхьичIва Жумяъ-Мизит бивкIсса кIанттайн ва мунияргу хьхьичIвасса Кьулла-Мизит бивкIсса кIанттайн.
ДГУ-лул студентътурахь чIярусса шиннардий тарихрал дарсру дихьлахьисса, Ухссавнил Ккавкказнаву ца яла жагьилма элмурдал доктор АхIмад Кьурбановлух хъунмасса гъирарай ва бусраврай вичIи дирхьуну бия бавтIми.
Гьай-гьай, ахирданий цинявппагу шяраваллил хьхьичIсса майданнив ссупралул лагма лавгуна.
