КоронавирусрацIун дар­хIуну хIасул хьусса тагьар сававну, инсантурал дуван дакI­нийсса, шинал, зурдардил хьхьичIра планну дирчуну диркIсса цикссагу давур­тту лирчIунни. «Шахьуйми» цIанилусса фондрал жагьилтурал ва шинай дуванмунил пландалувусса ца давуну дуссия бу­ттал шяраву Хъун дяъвилийн лавгминнан дацIан дурсса гьайкал дакьин дансса, 9-мур майрай микку, шагьрурдая цинявппагу бувкIун, хъуннасса шадлугъ дувансса. Амма мукун дуван къабювхъунни.

Бадрижамал Аьлиева
Дуван дакIнийсса лагрулий, чIяву инсанталгу гьурттуну, гьарта-гьарзану къахьурчагу, шяравусса цаппарасса инсантал бавтIсса хъун дакъасса митинг хьунни цIудуккан дур­сса гьайкалданучIа Ххувшаврил кьини. Хьунни дяъвилийн лавгми, аьрая зана къавхьуми, зана хьуну, цалва махъва-махъсса ссихIирайннин бу­ттал шяраваллил ва райондалул цIаний зий-захIмат буллай бивкIми дакIнийн бичлачисса ихтилат­ру.

Ххувшаврил Кьинилийннин гьайкалданул лагма-ялтту щириркIуну давуртту най ду­ссия: ванияр цикссагу шиннардил хьхьичI микку бувгьуну бивкIсса, бух хьусса сиреньдалул къатIри ва цаймигу щюллишин мархлуцIакул дурккун, лагмавагу бордюрданул кирпич бивхьуну, табасараннал чарттайну ххуллу бавкьуну, цийра гьайкалданийгу багьаймур дурну, лагма-ялтту тIутIив дургьуссар. Вай давурттавух гьуртту хьун ччисса жагьилтуравасса чIявуминнаща Лаккуйн бучIан къавхьунни, тагьар сававну.
Ци-бунугу, шяраваллил инсантурал шаймур бувну, каши дунал арцуйнусса, иширайну­сса, шайнал каруннил кушулийнусса ка-кумаграйну, жагьилтурал дуван дакIнийсса давур­ттал сияхIрайсса ца пункт уттигу бакIуйн бувккунни.