[dropcap]Л[/dropcap]акку билаятрайн баргъ щусса, щалвагу миллатран тIайлабацIулунсса ва барачатсса кьинир Гульшан Хасаева дунияллийн бувксса май зурул 12-мур кьини.

---

ПатIимат Рамазанова
[dropcap]Ш[/dropcap]аннагу район ваниву хIала духхавривугу дур цалунна­сса ххуйшиву ва хIикмат: Гульшаннул ппу Рамазан ЧIурттащатусса ур, нину Сарижат 1-мур ЦIувкIратусса, яхъанай бивкIун бур Гульшан ЦIуссалаккуйгу. Ванил хъинбалартту буллай бутантIисса оьр­мулул гьанурдугу цIакь хьуну бур агьалинан тирххандаранма лявхъусса кунмасса Рамазаннул ва Сарижатлул кулпатраву.

Ца зумату кунма, цинявннал вайннаяту дакIру ххуй­сса, тIуллу уздансса, хасиятру имин­сса, иш багьний сахаватну чIарав бацIайсса, дакIнихтунусса патриотътал бия учай. Ххуйсса бакъа учин къахьунссар учай. «Тарбиялуву, гьай-гьай, нитти- бутталмур бияла личIиссар. Ппу ихтилат чан­сса, захIмат ххирасса, аслийсса зун­тталчу ия, нину, дакI-аьмал хъин­сса бушивруцIун, хъярчру ххирасса, инсантурал дакIру таза дукканмур бусласисса буну муничIан кIункIу тIун бикIайва. Ми ттун оьрмулухунсса инсаншиврул, хъиншиврул ва буттал аьрщарал хIурмат бушиврул эбратну хьу­ссар», — учай Гульшаннул.

Лас Рашид хIакин ур. Ласнал ппу, Аьрасатнал лайкь хьу­сса хIакин, Аьрасат­нал цIанихсса кардиолог АхIмад Щайховичма, Гульшаннул цила учай­сса куццуй, ца яла хьхьичIунма дусгу, рувхIанийсса наставник, маслихIатчигу ур. Гьармуния хавар бусса, куртIсса ва цIакьсса кIулшивуртту дусса хъуначу ур.

1999 шинал лакрал миллатран оьрмулухун лахъан къашайсса хъинбалартту бувсса Мариян Илиясовал «Дараччи» клуб хIасул бувайхту, Гульшан ванил урчIакану, ниттил къабувсса ссуну, дусну бу­ссия. Лавмартсса цIуцIаврища Мариян ххассал буван къашайхтугу, къадяличIан риртунни Гульшаннул Марияннул дюрхъуну ва сантирай дуллай бивкIсса даву. Философиялул элмурдал доктор, профессор Асият Буттаевал увкусса куццуй, лайкьну гьаз бунни «Дараччилул» ттугъ – Чалагъай! Зунттал хъамитайпалул адаврал, марцIшиврул ва ххуйшиврул лишанну ва гьайчалину хъана­хъисса Чалагъай.

[dropcap]В[/dropcap]анин ххуйну кIулли шаннагу райондалул жяматгу, шагьрурдаймигу. «Дараччилул» дуллалисса давуртту чIяруми, гьай-гьай, миллатрал культура, литература, театр, магьирлугъ гьаз дуваву мурадрайсса дур, лакку маз ябаврил ххуллийсса давурттал чарсса дур. Чан ба­къар, цIимилул чувначIан кунма, кьини дуркни бучIаймигу, кумаг чIа тIутIимигу. Амма ттун къакIулли ванил кагу, чIунгу цукун хъирив лаяйссарив, кIулли ванил цучIав къулагъас къадурну къаитайшиву. Ца ссу кунма узданну, сахаватну чIарав бацIайшиву. Ва буллалисса хъинбала мудангу лявкIуну, паракьатну буван ччисса бур, хъунмур даву цила дуварчагу, дур­сса давривух циняв хIалану бусса кунма зана-кьулу хъанахъи­сса. ЛяличIисса сий ва хIурмат бур Гульшаннул лакрал миллатрал ва кIулцириннал дянив. Цуппагу буниялттунгу ляличIисса, магърибуллал ва машрикьуллал культурагу, стильгу исвагьийну цивура хIала хьусса, дунияллух­сса ябитаву щихачIав къалар­хьхьусса, буса-учаймур итталу-зумув личIанну учайсса, я щунал ябацIансса инсан бур.

Дагъусттаннал университетрал экономикалул факультет къуртал бувсса ва итххявхсса экономист, ишбажаранчи бур. МуницIухва, ванин ххуйну кIулли дунияллул литература, культура, миллатрал тарих, фольклор, цIакьсса ва куртIсса кIулшивуртту дусса инсан бур. Дазу дакъа ххирар ванин Ла­кку кIану, буттал шяравалу. Ва бур ЧIурттащиял шяравалу цIу дуккан дувансса хъит- шитлий зузисса фондрал хъунмургу. Дусъсса душвавращал архIал ПпабакIул бакIрайн гьаз шайсса сивсусса инсангу.

[dropcap]Ч[/dropcap]чимур къуллугърайсса, ччимур даражалийсса инсаннахь, ванийн вари куну, аьратталну ва кьянкьану гъалгъа бувайсса инсангу. «Даву дуван къаччимари багьантту хьхьичIун бугьлан икIайсса, дуван ччимарив дуван­сса чараннах луглан икIайссар», — чIявуну учай Гульшаннул. Ванин мудангу кьурчIи бизлан бикIай яхIлувсса, чантI увкусса лаккучунан, лаккущарнин кьурчIи бизлазимур: лак лакрал шяраваллая арх буцлай бушиву, лакран ни­ттил маз хьхьичIунну ва ххирану бакъашиву. Ванин инсантураву яла къаччимур хасиятгу биччиба­къашиву дунуккар, ппухълу лявхъусса ва яхъанай бивкIсса аьрщарах ччаву дакъа, хъанахъимуних ургъил бакъа бикIайссарив тIун бикIай.

ХIакьину ванил, цила хIарачатрайну бикIу, шяраваллил жяматгу лагма лаган бувну бикIу дурцири давурттал сияхI къадулланну. Так кIицI лаганну ванил инсантал цичIанма кIункIу тIутIи буллалисса тIи­лисингу бушиву, дахIалай чинну цицIунна даркьусса харизмагу душиву, цIа ттюнгъасса духьурчагу, иширачIа чувнал хасият дусса бушиву. МуницIухва ва бур ххаллилшиву цирив къакIулсса, хьхьичIун бурувгсса, ласнал ляхъиндалунгу чIалачIин дакъасса, инсан. Ва бур тIайлабавцIусса ташулул кюру ттиркьюкьи кунма ябуллалисса кулпатгу, ххишала бакъа ххуйсса нинугу, магьа кунмасса амудадагу. КIива мукъуйну учин, ва бур къатлул чирахъ. Рашидлул ва Гульшаннул оьрчIругу, нину-ппу кунма, хьхьичIун бурувгсса, ларайсса мяърипат, культура дусса бур. .
Барча, Гульшан, вил юбилей! Вил чаннасса дакIнил чанначIан кIункIу тIийнма ли­чIаннав циняв!