ЦIанасса, коронавирусрал азар сукку хьусса, тагьарданий аьдатравун дагьсса куццуй, лахъа-хъунну, чIявусса хъамалгу бавтIун дан къахьурчагу Ххувшаврил байран, Ккурклив ва кьини бусраврай дакIнин бивчунни Ватан душманная дуручлай бивкIсса вирттал.
Андриана Аьбдуллаева
Азарунния мюхчан хьунсса чарангу лявкъуну, шяраваллил аьрали музейрал директор Даниял Магьдиевлул сипталий, ца-кIива учитель ва дуклаки оьрчIру бувккунни щарнил майданнив дяъвилий жанну дуллусса 57-гу ккуркличунал цIарду чирчусса ЯтIул ттугълищал. Майданнул лагмагу бувккун, оьрчIал ва учительтурал тIутIив дирхьунни дяъвилийн лавгминнал аьпа абад бан дацIан дурсса гьайкалдануцI, цIакь бунни гьайкалданул кIивагу чулух ятIулсса ттугъру, дацIан дунни И.В.Сталиннул сурат.
ОьрчIал бюхттулну кIицI ларгунни дяъвилий жанну дуллусса 57-гу ккуркличунал цIа. Хъирив щала делегация лавгунни цIанихсса Арнил бакIуйн. Шичча, хъатлий дирхьусса кунна, чIалай дуссар щала шяравалу. Арнил бакIул мицIливгу оьрчIал ва учительтурал цIакь бунни ЯтIулсса ттугъ. Дяъвилул чIумал шикку бивкIссар душманнал самолетру лехларча баян бан бацIан бувсса пост. Ва щалагу даврил сиптачи ва сакиншинначи хьунни ялун нанисса ник Ватан ххирану тарбия даврил цIаний хъунмасса захIмат бивхьусса ва бихьлахьисса хIакьсса патриот Даниял Магьдиев. Букъавсун къабучIир Ватандалухссагу, шяраваллил жяматрахссагу ччаву буттая ирсирай дирсса Данияллул оьрчIалгу утти – цIанасса шартIирдайгу байран кIицI дансса чаран лявкъунни.
[dropcap]М[/dropcap]ахIачкъалалив байрандалун хасну чIюлу дурсса цала хIаятраву, аьрая зана къавхьусса цинявппагу ккурккулгу дакIнин бивчуну, Ххувшаврил байран кIицI дунни щала цала кулпатращал Данияллул арснал Робертлул. Укунна Москавлив, цала ичIува, мюрщимигу, хъунимигу хIала бувххун, лахъа-хъунну кIицI ларгунни байран Данияллул душнил ПатIиматул ва вайннал гъанчу Инарал.
Москавлив ялапар хъанахъисса мюрщи оьрчIан дяъвилий жанну дуллусса цала вирттаврал цIарду кIулну душивугу хъунмасса ишри.
МукIрура, укунсса патриотътал жула дянив буссаксса, Хъунмасса Буттал кIанттул цIанийсса дяъвилул тарихгу, ци хIарачат булларчагу, щищачIав баххана бан къахьунтIиссар, му чивчусса вирттаврал цIардугу абадлий дакIний дикIантIиссар.