Дайдирхьунни оьрчIан яла ххирасса гъинтнил каникуллал чIун. Ссавур дакъа ялугьлан бикIай дуклаки оьрчIру, хаснува мюрщими, бигьалаган цала буттал шяравун ягу гъинтнил лагерьдайн гьан.
ЦIуссалакрал райондалий оьрчIру бигьалагаврил къайгъурдай бур Жагьилтурал иширтталсса бувайсса райондалул комитет ва УСЗН (Агьали социал иширттал чулуха буруччаврил управление). Ми идарарттал щаллу буллай бур оьрчIру гъинтнил лагерьдайнсса путевкардал. Жагьилтурал иширтталсса бувайсса комитетрал хъунама Тимур Абакаровлул бусласимунийн бувну, комитетрал чулуха хьхьичIва-хьхьичI лагерьдайн тIайла бувккун бур 55 оьрчI, миннава 30 оьрчI бигьалаглай бур Гъуниннал райондалийсса «Орлиное гнездо» тIисса лагерьданий; 20 оьрчI, миннава 10 Новостройраясса, Къаяккантуллал райондалий хьхьирил зуманивсса «Надежда» тIисса лагерьданий. Ми оьрчIру бигьалаглагиссаксса хIаллай миннаха аякьа дан тIайла бувкссар вожатыйтал: ДЮСШ-лул дзюдорал тренер Герман Муслимов ва Аьлимова Диана. Ми бувкIун мукьах, вава комитетрал чулуха гьан бан тIий бур 30 оьрчI ялагу, «Каспий» тIисса лагерьданийн ва 15 оьрчI Нальчик шагьрулийсса «Грушевая роща» тIисса оьрчIал санаториялийн. Шиккун гьан ччиминнаясса аьрзри уттигу кьамул буллай буссар.
ОьрчIру бигьалаган тIайла буккавриха зий бур райондалул УСЗН-гу. Ва управлениялул хъунама К. Анккалаевлул бусласимунийн бувну, вайннал чулухасса путевкардай бигьалаган лавгун бур 80 оьрчI, миннава 20 оьрчI ур Гергебиллал райондалийсса «Березка» тIисса лагерьданий, 15 – «Орбита» лагерьданий, 20 оьрчI – «Данко» тIисса лагерьданий (Буйнакскаллал район). Ми бакъассагу 20 оьрчI ялагу бигьалаглай бур «Аист» тIисса Избербашуллал чIаравсса лагерьданий. Ми 80-гу оьрчIава 65 оьрчI ЦIуссамехельтIиял шяравасса бур. Бигьалаган лавгсса оьрчIал сияхIраву ЦIуссамехельтIиял оьрчIру чIяву шаврил багьана му хьуну бур, ва шяраваллил администрациялулгу, школалул дирекциялулгу цалва оьрчIай бакI цIуцIаву даву, ччяни хъирив буккаву. Цинявппагу лагерьдайн оьрчIащал тIайла бувккунни школалул учительтал. Ва нюжмардий УСЗН-далул хъунама цува лавгунни оьрчIру бигьалаглагисса лагерьдайн миккусса тагьар ххал дан. Рязину увкIунни миккусса шартIирдая, дуки-хIачIиялия ва лагерьданул зузалтрал оьрчIахсса аякьалия.
— Жулва оьрчIал, личIи-личIисса спортрал бяст-ччаллавух гьуртту хъанай, ххуйсса ккаккияртту чIалачIи дуллай бур. Ми оьрчIру экскурсиялий буцлай бур республикалул тарихрацIун бавхIусса кIанттурдайн, — тIий, буслай ур К. Анккалаев.
ЗахIматран лайкьсса кьимат бивщунни
Июнь зуруй щалвагу билаятрай лахъа-хъунну кIицI лагай жулва оьрмулуву ца яла агьаммунин ккаллисса пишалул – Медициналул зузалал кьини. Му байрандалуцIун бавхIуну ЦIуссалакрал райондалул 1-мур азарханалий ларгунни зузалтрансса шадлугърал кьини.
«Пегас» ресторандалул хIаятраву ва кьини бавтIун бия цинявппагу ва азарханалул зузалт. Ми барча бан увкIун ия райондалул бакIчи ХIажи Айдиев, мунал хъиривчу Аьли Исрапилов, Аьхъардал шяраваллил администратор МахIаммад Магьдиев, ЦIуссачIурттащиял хъунаманал хъиривчу Юсуп Аьлиев. ТIивтIуну бия авадансса столлу, баллай бия музыкалул чIурду, бувкIун бия бусравсса хъамал.
ЦIуссалакрал 1-мур азарханалул зузалтрал мудангу цалва пишалул кьини лавайсса даражалий кIицI лагай. Гьашинурив му байран хъиннура ларайну тIайла дуккансса ххаришиву цамургу хьунни. ДакI марцIну бихьлахьисса захIматрахлу ва къашайшалтрахсса аякьалухлу азарханалул хъунмур хIакин Исрапилова Булбуллун, мунил заместитель Сулайманова Басиран, участокрал хъунама терапевт Каммаев АьдурахIманнун, «Анаварсса кумаграл» хъунмур хIакин Рамазанова Маян ва азарханалул 9 медсестраннан дуллунни «Отличник здравоохранения РД» тIисса бусравсса цIа. Азарханалул хъунмур хIакин Булбул Исрапилован награда дуллай, ХIажи Айдиевлул барча бунни азарханалул коллектив пишалул байрандалущал, барчаллагь увкунни зузалтрахь агьалинал цIуллу-сагъшиву дуруччаврил цIаний бихьлахьисса захIматрахлу, къашайшалтран хIасул дурсса шартIирдахлу. Азарханалул хъуниминнал чулуха хIурматрал грамотарду ва арцуйнусса бахшишру дуллунни ялагу шикку зузисса 16 зузалан.
Ва азарханалул цIа ччяни машгьур хьунни райондалул бакъасса республикалул агьалинал дянивгу. Мяйжаннугу, вайннал захIматран лайкьсса кьимат бивщунни. Яла хъунмур кьиматрив вайннан бишлай бур шиккун багьсса къашайшалтрал, вай цимилагу лайкь хьунни миннал чулухасса барчаллагьирттан.
ХIадур бувссар
А. Аьбдуллаевал
ва И. Саидовал
