Уттигъанну ЦIуссалакрал райондалул администрациялул къатраву хьунни шяраваллал бакIчитуращалсса ва райондалул личIи-личIисса идарарттал каялувчитуращалсса ирглийсса совещание.
Совещаниялий райондалул Физкультуралул ва спортрал комитетрал даврил хIасиллах вичIидишинсса пикри бивкIссар. Амма, райондалул бакIчи ХIажи Айдиевлул кIицI лавгсса куццуй, цал аьркинну бур комитетрал даврил хIакъи-хIисав дан, спорт хьхьичIуннай шаву мурадрай итадакьлакьисса арцу цуксса мюнпатну ишла дуллай бурив ххал бан. Махъсса ххюра шинал дянив му мурадрай бюджетрава итадакьлакьисса арцу 250 азарда къурушрая 1,5 миллиондалийн дирну дур.
– Му харжлугъран лархьхьусса хIасиллу хъанай дурив ккаккан аьркинни. Мунияту ва масъала хъиривмур нюжмардийннин битан багьлай бур, — увкунни ХI. Айдиевлул.
Хъирив райондалул хъунаманал бувсунни республикалул бакIчинал ва ДР-лул ХIукуматрал администрациялул хъунаманал Хасаврай дурсса зоналул совещаниялия. Микку цаппара аьрщив ишла давриву ва налогру датIавриву аьйрду ккарксса кIанттурду хьунни. Аьй ккарккунни ЦIуссалакрал райондалийгу.
ХIажи Шихамировичлул кIицI лавгунни, аьрщи арендалий дуллусса иширттал 90% шяраваллал бакIчитуращал бавкьуну ягу миннал тавакъюрайн бувну дуллусса душиву, мунияту, аьрщи ккаккан дурсса куццуй ишла даврил ва арендалух багьа ласаврил ялув бацIан аьркиншиву администрациярттал бакIчитал.
— Аьрщи арендалий дулара тIутIими ми ккаккан дурсса мурадрай ишла данну, шяраваллил хозяйствалуву агьали зунсса ххишаласса кIанттурду дузал банну тIий буссия, амма ми цавагу зат щаллу къабаврицIун, арендатортурал аьрщи ишла дуллалаврихсса багьагу буллай бакъар. Масала, ларгсса шинал аьрщи ишла даврих къадуллуну дур 1,875 азарда къуруш, — увкунни ХI. Айдиевлул. Райондалул бакIчинал дакIнийн бувтунни ларгсса шинал ахирданий арендалий дуллусса аьрщи ккаккан дурсса куццуй ишла дуллай бурив ххал бансса комиссия бувну бивкIшиву.
Мунал тапшур бунни шяраваллал бакIчитурайн комиссиялул даврил хIасиллу ххал дан ва нюжмардул дянив аьркинсса куццуй ишла къадуллалисса аьрщарал масъала ца чулийн бутан. Мукунма арендалух дагьлагьисса цинярда арцу ласунсса чаран лякъин.
Райондалул бакIчинал цалчинма заместитель Аь. Буттаевлул шяраваллал администрациялул бакIчитурай аьй ккарккунни, миннал администрациялийнсса аьрзардан чIумуй жаваб къадуллалишиврий.
