[dropcap]Л[/dropcap]аргсса шинал райондалул щархъурду кувннищал кув дахIавриву хъуннасса агьамшиву дусса, Хъюйннал шяравалличIахсса Хъуннеххайхсса ламу тIивтIунни.
ЧIявусса агьали бавтIсса митинграй гьуртту хьун увкIун ия Дагъусттан Республикалул ХIукуматрал Председательнал цалчинма хъиривчу ХlажимахIаммад ХIусайнов.
Мунал цала ихтилатраву кIицI бувссия Ккуллал райондалийсса ххуллурду гьануцIакул бакьин буллантIишиву. Вана утти, кIива барз ххишалагур, райондалийсса ххуллурду бакьин буллай байбивхьуну. Ва даву бакIрайн ларсун дур «ООО АРЭМ» идаралул. Ванил директорну ур Амиров Апанни Амирдул арс.
Май зурул цалчинсса гьантрай ттуща бювхъуна «Мамраш – Ташкапур – Араканнал ламу» ххуллул 133-мур километралия 248-мур километралийн бияннинсса ххуллу буллалисса Зайнуттинов ГъазимахIаммадлущал ихтилат буван. Ванал бусаврийн бувну, ва ххуллу бакьин буллай бусса бия, Лакрал райондалийсса ШавкIуллал шярава байбивхьуну, Ккуллал райондалийсса ЧIяйннал шяравун бияннин. Му кьини най дия чIярусса давуртту. ЧIяйннал шяравалличIасса ххюлузандарая ххюл ххилай бия ЯтIувахъайсса дуланманттайн. Мунищал архIала Ххажалмащилиягу ххилай бия цайми журалул ххюл. Вайгу бичлай бия лях-карах.
Щардал мащилучIату яларайсса дуламантту пIякь учин дурну, экскаваторду, гай аьрщи дукьлай, зий бия. Тикку зий бусса бия 20 «Камаз», 4 экскаватор, 4 бульдозер, 2 каток, 2 автогрейдер. Зузисса техника янилун дагьлагьинийгу, арх бакъа, ШавкIуллал чIарав, буллалисса хъунмасса кIива ламугу хIисав бувсса чIумал, дакI ххари-шадшиврул дуцIлай дия.
Жувагу чIа учинну зунттал инсантуран къулайшивуртту хIасул дуллалисса зузалтран тIайлабацIу!
ХIадур бувссар
Арсен Аьбдуллаевлул
ш. ЧIяйми
