[dropcap]Г[/dropcap]ьашинусса Ххувшаврил 75 шинал юбелейрал кьини кьатIув хьунадакьин къархьунни. Махъсса шиннардий дайсса «БивкIу бакъасса покрал марш» къадурнура лирчIунни.
Вай давуртту къадаврин багьана хьунни дунияллийх ппив хьусса, уттинин къадиркIсса коронавирусрал инфекциялул цIуцIаву. ЧIумуйну шаппа щябивкIу бухьурчагу, карантиндалул тIалавшиндарайну, дакьаву ххирасса халкьуннал байрандалул кьини цала шарда дувунни дяъвилул гьурттучитурая бусласисса флешмобру.
Хъинну ххуйсса флешмобру дия хIадур дурну ЧIяйннал школалул учительтурал ва дуклаки оьрчIал. Миннул сиптачину хьуну бия физикалул ва хIисаврттал дарсирдал учительница Муслимат Исяева.
Дуклаки оьрчIру бия ларххун аьрали янна, ккалай бия дяъвилухасса назмурду, ккаккан дуллай бия лях-карах, дяъвилул гьурттучитурал суратру.
Хъинну ххуйсса флешмобру дия дяъилул гьурттучи Рамазанов АбутIаблул душ Гуржагьрал, Аьдуллаев Сулайманнул арсурваврал, Рамазанов МахIаммадлул душнил Аьбдуллаева СахIив-Султаннул, МахIаммадов Павеллул душнил Сулайманова ПатIиматлул ва цайминналгу.
Дия мукунна дяъвилул цаймитгу гьурттучитураясса дакIнийн бичавуртту.
Жунна жула буттахъал ккаккан дурсса чувшивуртту тач1ав дакIния къадуккантIиссар. Жунна дуллусса ва ххуйсса дуниялгу журагу мюхтажну ядан аьркинссар.
