Августрал 10-нний Ххюлуссуннал шяраву хьунни Лакрал райондалий милицанал даврий зий 2009-ку шинал террористътурайнсса данди ацIавриву аьпалухьхьун лавгссаАмсар Къунжуевлул цIанийсса волейболданул турнир. Му цурдагу дархIуну дия Амсар аьпалухьхьун лавгун 10 шин шаврицIун.
Мунил сиптачиталну хъанай бия шяраваллил жагьилтал, жяматрал сакин дурсса фондрал кумаграцIух.
ШколданучIасса майданнив щала жямат бавтIун бия. Шагьрулия бувкIсса инсантурал шяравалу чантI учин дурну дия.Турнир дайдишин хьхьичI шяраваллил бакIчи Шамил Абачараевлул барча дуруна волейболданул турнир.
Турнирданий гьуртту хъанай дия арулла команда. Царагу команда цаннияр ца махъун дагьлай дакъая. Тамашачиталгу чIявусса бия.
Турнир къуртал хьуна ахттакьуннай ссят ххюнний. Кубок лавсунни «Ассалам» командалул, кIилчинмур кIану бувгьунни «хъунисриннал» командалул, шамулчинмур кIану – «жагьилтурал» командалул.
Дуллунни грамотартту ва бахшишругу. «Яла гьунар бума укку» тIисса грамота дуллунни Амиров Камиллун; «Яла ххуйма тренер» тIисса грамота дуллунни «Ассалам» командалул тренер ХIадисов ХIадислун.
Кьурбанисмяил Амиров
