Август зурул 13-нний Москавлив ва Федерал округрал шагьрурдай хьунни «Дустал цачIун буллай буру» тIисса Дунияллул халкьуннал дянивсса музыкалул фестиваль. Шикку гьуртту хьунни, Аьрасатнал искусствалул ишккаккулт бакъассагу, кьатIаллил билаятирттаясса делегациярттугу. Фестивальданул лагрулий хьунни Дагъусттаннал Музыкантътурал союзрал председатель, пианист Хан Башировлущалсса хьунабакьавугу.
Имара Саидова
Ванал цала ихтилатраву бувсунни Дагъусттаннай музыкалул искусствалул тарих загьир шаврия, щаллу бунни Дагъусттаннал машгьурсса композитортурал произведенияртту, дуллунни тамашачитурал суаллахьхьун жавабру, дунни дакIний личIансса бахшишру. Ахирданий, Хан Башировлул кIицI лавгунни, Дагъусттан мудангу Аьрасатнащал цачIуну бикIантIишиву ва кьиматрай бушиву Аьрасатнал авадансса культуралул тарих.
Хьунабакьавурттугу хас дурну дия гьашину Дагъусттаннал Музыкантътурал союзран 60 шин хъанахъисса ва Дагъусттаннайн къачагътал ххявххун 20 шин кIицI лаглагисса юбилейрттан.
