Ттун ца кьюлтIсса затну чIалан бикIайва азарханартта­хьхьун, поликлиникарттахьхьун къашайшала хъин аврих дулайсса арцул иш-тагьар. «Векрай яхъанарчагу, кIулшиву ласлан къачIалссар» тIисса учалагу тIайласса бур. Уттигъанну, ттула ноутбук зия хьуну, га бакьин бансса инсаннах райондалий луглай унува, ттухь бувсуна Ккуллал райондалул азарханалий ушиву компьютердал иш-тагьар ххуйну кIулсса ХIажи тIисса инсан.

РамазанхIажинал (ванал щаллусса цIа укун­сса дия), на дакIнихтуну кьамулгу увну, ххал бувна ттул ноутбук. Мунил микросхема дакъашиврийн бувну, бакьин бан къабювхъуна. Амма цама гьалмахчунаща чIумуйну лавсъсса процессордануву ттун аьркинсса программа дирхьуна. Ва давугу ванал укра дуруна. Шагьрулий укунсса даврих биялсса багьа ласай.
Ттунгу ччан бивкIуна РамазанхIажи зузисса Ккуллал райондалул азарханалул информациялул ва аналитикалул кабинетрал даврия жула кказит буккултрахьгу бусан.

---

ХIажимурад ХIусайнов
Ца-кIива гьантлува на цIу­нилгу увкIссияв шиккун. Ра­мазанхIажиная ттунма кIул хьумур, ванал бувсмур кIибачIин ччай ура зущалгу.
— На ЧIяйннал шяравасса ура. 1996-ку шинал къуртал бувссар Туркманнал Политех институт­рал техникалул кибирнетикалул факультет. Яла хъирив ца шин дурссар аьралуннаву къуллугъ буллай. 1998-ку шинал га чIумалсса Ккуллал райондалул азарханалул хъунама хIакин Аьша­ев Нуруллагьлул тавакъю бувуна ва кабинетрай каялувшиву дува куну. Вана утти 20 шин хъанай дур ва даврий зий. Жул давуну хъанахъиссар, ФОМС-рал программалийн бувну, амбулаториялий, поликлиникалий, ФАП-рай ва шиккува азарханалул стационарданий хъин хъанай бивкIсса инсантурал хIасиллу чирчусса карточкар­ттайсса ва талоннайсса чичрурду. Вана вай чичрурдайн бувнур ФОМС-рал жун арцугу итадакьайсса. Ялагу дуссар, ФОМС-райн хъар къахъанай, тIайланна хIукуматрал программалий арцу итадакьайсса цIуцIавуртту.

Ми дур СПИД, наркология ва фтизиатрия. Жул кабинетрал щаллу дайссар мукунна райондалул инсантурал цIуллу-сагъшиврия бусласисса статистикалул давурттив. Аьрасатнал ЦIуллу-сагъшиву дуруччаврил министерствалул хIукмулийн бувну дувайсса диспансеризациялул давурттал сияхIгу жу щаллу дайссар. Ялагу жул даврия хъунмасса кумаг буссар, жучIава хъин уван къахъанай, цамур кIанайн тIайла увксса къашайшалан.

Ванал диагноз дирхьу­сса чичрурду дуссар карточкалий, му ду­ссар компьютердануву. Ва тIайла увксса кIанттуща хъанахъиссар га къашайшалал иш-тагьар цукунсса диркIссарив кIул дуван. Ялагу цIуцIавурттал дур цалла-цалла программартту. Буссар хIакинтурал кабинетир­ттавугу компьютерду. Гай нажагь зия хьурча, жу бакьин байссар. Амма УЗИ аппаратура ва гайми аппаратру жуйн къабагьай­ссар. Гай бакьин бай­сса фирмарду личIисса дур. Нава акъагу, ши­кку зий уссар ялагу шама пишакар: АхIмадов ТIагьир (Хъюйннал шяравасса), АхIмадов Назар (Вихьуллал шяравасса), Абакарова ПатIимат (Ккуллал шяравасса).

Инава куна, компьютер зия хьуну жучIан увкIсса инсангу жу тачIав махъунай гьан къаару. Бюхълахъисса кумаг бувару.

Мукунми чIявуми бикIай школарттал директортал.
— Барчаллагь, РамазанхIажий, кIанийн бувтун бувсса ихтилат­рахлу.