Дарбантливсса, Аьрасатнаву яла хъуннамур фонтандалучIасса, ифтарданий 35 азара инсан гьуртту хьушиву баян бунни республикалул Муфтиятрал.
ПаччахIлугърал къуллугъчитал, жяматийсса ишккаккулт, спортсментал, туристал гьуртту хьусса ва ифтар бавтIцириннал дакIурдиву ххуйсса, хъамакъабитансса асарду кьабивтсса хьушиву буслай, чичлай бур социал сетирдай. Зувиллий ххюазара инсаннал хьхьичI зума итадакьинсса ччатI бишин бигьасса даву дакъархха.
Ваниха зузиминнал бувсунни пулавран шанна тонна ппиринжрал ва дикIул аьркин дагьшиву. Ряхттурша волонтёр ивкIун ур кумаг буллай. Ифтарданий гьуртту хьунни дунияллийх цIа ларгсса, нашидру учайсса Мусттапа Атеф. Программа ярг дуван дия фонтандалул шоугу. БавтIцири барча буллалисса махъ лахълай, шагьрулул хъунама Рустамбаг ПирмахIаммадовлул кIицI лавгунни Рамазан барз агьалинал хасиятру ххуй дуваврил, хъинбаларттал, хъиншивурттал ва рахIму-цIимилул барз бушиву, Дарбантливгу агьали, миллатру, динну личIи къадуллай, бавкьуну, нахIуну яхъанай бушиву, шаннагу диндалул хIурматгу бушиву.
«Цайми регионная бувкIсса хъамаллуран жулла рувхIанийсса культура ккаккан дуван бювхъунни», – увкунни Дарбантуллал пресс-службалул вакилнал. Мероприятие къуртал дурна фейерверкрайну.
