Апрель зурул 16-нний Цалчинмур ЦIувкIуллал шяраваллил агьлу бавтIун бия МахIачкъалалив «Щунудагъ» тIисса банкетру бай залданувун ца ссупралух зумарду итадакьин. Ва шяраваллил тарихраву цалчинсса ифтар хъанай дур, ванил сиптачигу ур шяраваллил имам Аьлиев Муса. Ванал бувсунни, шяравунияр шагьрулий чIявусса цIувкIул яхъанай бухьувкун, пикри ца бувну, ифтар шагьрулий дувансса хIукму бувшиву.
Дайдирхьуна мероприятие Кьурандалул аятирттая. ЦIувкIуллал Жяматийсса советрал хъунама, профессор МахIаммадбаг ХIусайхановлул, бавтIцири барча буллай, кIицI лавгунни, жагь баласса ковидрал пандемия сававну, жагьгу цайми дайшишрурду хьуну, цIувкIуллал жямат цачIун батIинсса иш къавхьушиву махъсса шиннардий. Ккуллал райондалул имам МухIаммад Маннар Бариевлул цалва ихтилатраву чIурчIав дунни диндалул кьимат бусса, исламрал ххуллу-ххуттайх нанисса жагьилтал бушиврийнугу шяраваллил агьулданул оьрму хьхьичIунмай хъанахъишиврий. Шяраваллил администрациялул хъунама МахIаммад-Расул Илдаровлул, динчи МахIаммад-Рамазан Кьурбановлул, активистътал МахIаммад Юнусовлул, ОьрбакIай МахIаммадовлул, ХIажимурад Исяевлул, Мурад Халимбаговлул бувсунни цуку-цукунсса давуртту дуван дакIний буссарив шяраваллил рувхIанийсса культура ва ирс-ххазина ябаву мурадрай.
[dropcap]Ч[/dropcap]Iявуя ифтарданийн бавтIцириннаву мюрщисса оьрчIругу. Вайннансса викторинагу хIадур дурну дия ифтардануха зузиминнал. ХIадур дурну дия оьрчIру ххари бувансса бахшишругу. Мюрщисса оьрчIру. имамнал лагма лавгун, диндалул кIулшивуртту ккаккан дуллалисса лахIзава ссал къабагьая! Имамнал Барчаллагьрал чагъарду буллуна цала дуллалимуницIун кабавкьуну, мукъуйну, иширайну чIарав бацIлацIисса инсантуран.
Утти ифтарданий гьуртту хьуминнал цаппара пикрирдугу.
Супиян Оьмаров:
– Ттул хъуннасса ххаришиву дур, шяраваллил жагьилтураву дурккусса, чантI увкусса, исламрал ххуллу-ххуттайх нанисса, цIувкIуллал ххуй-ххуйсса аьдатру ядуллай, ялун наниминнангу лахьхьин дуллалисса мадарасса бушиву чIалай. ЦIувкIул гьар ишираву итххявхссар, дуллалимуниву хьхьичIунну гьуртту шайссар. Ва базилухгу ккаккан бунни исламрал хIурмат лахъсса бушиву. Жува уттиния тийнмайгу бюхъайссаксса хIарачат буванну мюнпатсса давуртту дуван.
ПатIимат Зиркьуева:
– На барчаллагь тIий бура ва зал буллусса Оьмаров Жамалуттиннуйн. Ванал кулпат Аьишатлулгу, бунагьирттал аьпа баннав, ххуйсса хъамитайпа бикIайва, цIувкIуллал тамансса мероприятияртту ва залдануву дувайссия. Навагу ва ифтардануха зузисса сакиншиндарал комитетраву бухьувкун, ттула буржну чIалай бура ва даву лавайсса даражалий дуван хIарачатрай бивкIминнахь барчаллагь учин. Ссят ацIуннийва ва залданувун бавтIун, гъирарай кумаг буллай бивкIунни, вай жагьилсса оьрчIру, дихьлай, дукьлай, хIала бувххунни. Ва ифтарданул барачат щалвагу щарнил жяматрайн бияннав тIий бура. БувкIцириннайн барчаллагьрай бура, жува цачIун батIин шайсса, кувннал кув бувгьусса, диндалул хIурмат бусса бушиву ккаккан буваврихлу. ЯлунчIингу зумарду дугьлан цIуллушиву дулуннав, дургьуцириннал зумарду Аллагьу Тааьланал кьамул даннав!
