[dropcap]С[/dropcap]ентябрьданул 2-нний Ккуллал райондалийсса 14-вагу школалул хIаятирттавугу хьунни цIусса дуккаврил шинал дайдихьулун хас дурсса линейкар­тту.

ХIажимурад ХIусайнов
[dropcap]Ш[/dropcap]иная шинайн чан хъанай бур шяраваллаву школалийн заназисса оьрчIру. ДукIу уссия 757 оьрчI, гьашину ур 750 оьрчI. Ларгмур дуккаврил шинал 1-мур классравун бувкIун буссия 71 оьрчI, гьашину ур 67 оьрчI.
Гьашину ттун дуккаврил шин дайдишаврил линейкалух-шад­лугърах ябитан бахтти хьунни Ваччиял школалий. Школалул хIаят, шарду лавххун, чIюлу дурну дия, хъуннассара чIюлушивурив дуллай дия исвагьийсса яннардавусса оьрчIал. Гьай-гьай, бия оьрчIахь тIутIал кацIругу.

Дуккаврил шин тIитIавривух гьуртту хъанай бия: Ккуллал райондалул бакIчи Шамил Рамазанов, Ваччиял шяраваллил бакIчи Арсен МахIаммадов, Дагъусттаннал аьрщарал иширттал ялув бавцIусса министерствалул бакIчинал хъиривчу Мурад Аьлиев. Шадлугъ дачин дурну бия Ваччиял школалул директор Бажи Мирзоева, завуч Аьлибек Аьлибеков, учительтал Марзият Мяъсудова ва Ирина Загьидиева.

[dropcap]Л[/dropcap]инейкалий бавцIусса оьрчIал хьхьичIух лагма буккан бувна школалул ттугъ. Цалчинмур класс­равун бувкIсса оьрчIал цала учительница ХIурия ХIусайноващал дурккуна дикломацияртту, бивзуна къавтIун. ОьрчIру барча буллалисса ихтилатру бувна хъамаллуралгу. Учительтуран дуллуна райондалул администрациялул чулухасса грамотартту. Школалул чулухасса грамотартту дуллуна ларгсса шинал дуккавриву ххуйсса ккаккияртту дурсса оьрчIангу.
Ахирданий бивщуна 1-мур классравун бувкIсса ва 11-мур классрал оьрчIал цачIуну цалчинмур гюнгутIи. Дайдирхьуна ду­ккаврил шин.