КIилийнусса байран дия гьашину Гъумучиял школалий КIулшивурттал кьини. Ва базилух му тIайла дарцIунни хъунасса аьлимчу Дандамаев МухIаммад Аьбдулкьадирдул арс дунияллийн увккун 90 шин бартларгсса кьинилийн.Юбилейран хасну Гъумучиял школалул чIирай тIиртIунни аьлимчунал аьпалул ула.

---

Зулайхат Тахакьаева
[dropcap]Ш[/dropcap]адлугърай гьуртту хьунни ДР-лул культуралул министр Зарема Буттаева, Лакрал райондалул бакIчи Юсуп МахIаммадов, КIулшиву дулаврил управлениялул каялувчи Явсупи ХIамзаев, райондалул идарарттал каялувчитал.
Аьлимчунал оьрмулия ва элмулул ххуллийсса даврия буслай, Юсуп МахIаммадовлул кIицI лавгунни МухIаммад Дандамаев ккаллину ушиву щала дунияллийх цIа ларгсса бюхттулсса даражалул аьлим­чунан, Баргъбуккавал билаятру ххаллилну кIулсса тарихчинан.[pullquote]Гьашину Лакрал райондалий школалийн лавгунни 800-ннийн бивсса оьрчIру. Цалчинмур классравун лавгунни 80 оьрчI. Миннава 40 – Гъумучиял школалийн.[/pullquote]

— Гъумучиял школа къуртал бувну лавгун, МухIаммад Дандамаевлул жула районгу, щала Дагъус­ттангу дунияллун машгьур бувссар. Зу пахрулий бикIан аьркинссару хъунасса аьлимчу дуклай ивкIсса школалий зунмагу дуклан нясив хьуну бушиврия. Зувагу хIарачат буллан аьркинссару школалул цIа дуруччин ва ваниярдагу ларай дан, — увкунни Юсуп МахIаммадовлул дуклаки оьрчIахь.

Аьлимчу дакIнийн утлатисса ихтилатру бунни ГьунчIукьатIрал школалул директор Малик Къушиевлул, Лакрал райондалул Хъунисриннал советрал хъунама Даниял Магьдиевлул.
Аьпалул улттуя пардав дуркьунни Зарема Буттаевал, Юсуп МахIаммадовлул ва аьлимчунал уссу Сократ Дандамаевлул.

Аьпалул ула тIиртIуну махъ дайдирхьуна цалчинмур занглил савлугърал линейка. Аьдатравун багьсса куццуй, кIулшивурттал ххуллийнсса шадлугърал линейкалийн мюрщулт буккан бувна 11-мур классрал дуклаки оьрчIал карду дургьуну.

Школалул директор Ххадижат ХIусниевал кIицI лавгунни ларгсса дуккаврил шинал школалул оьрчIал хьхьичIунсса кка­ккияртту хьун дуршиву республикалул лагрулийсса олимпиадар­ттай, конкурсирттай ва спортрал бяст-ччаллай. Микку хьхьичIунсса кIанттурду бувгьусса оьрчIан дуллунни ХIурматрал грамотарду.
Дуклаки оьрчIан тIайлабацIусса шин чIа тIий, Юсуп МахIаммадовлул кIицI лавгунни хъунмур къулагъас тарбиялул даврих дуллан багьлай бушиву, тарбия дакъаний дагьай­сса кIулшивугу ласун къабюхъавай тIий, оьрчIал оьннасса чIун дайгьин кабакьу буллалисса спортрал ва физкультуралул даврихсса къулагъасгу хъиннура гужлан дуллан багьлай бушиву.

Бувсунни «100 школа» проектравун гьашинугу багьну бушиву кIива школа – ЧIурттащиял ва Ккурккуллал. «Точка роста» гуманитар ва цифровойсса профиллал центр тIитIинсса тIайлабацIу хьуну бушиву Гъумучиял ва КIундиннал школарттан. Вайннул ялун бувсунни цамургу ххарисса хавар. Ялун нанисса цIусса шинавун тIитIин тIий бур цIусса школа, ттизаманнул оборудованиялул щаллуну дузал бувсса.

Цилагу, Республикалул БакIчи Владимир Васильевлулгу цIания дуклаки оьрчIру, педагогтал, нину-ппу барча буллай, Зарема Буттаевал кIицI лавгунни  КIулшивурттал кьини ккаллину душиву шинаву ца яла агьамсса ва ххарисса байрандалун.
— ЦIусса дуккаврил шинал жула республикалий школалийн гьантIий ур 418 азара оьрчI, миннава цалчинмур классравун – 52 азара. Лакрал райондалий цалчинмур классравун най ур 80 оьрчI. Цалчинмур классравун наниминнан ва байран ляраличIисса байран хъанахъиссар. Миннан тIитIлатIиссар кIулшивурттал ххуллу, — увкунни Зарема Буттаевал.

Ванил кIицI лавгунни махъсса шиннардий республикалий хъуннасса къулагъас дуллай бушиву кIулшиву дулаврил даража лавай баврих. Федерал ва республикалул программарду, национал проектру зузи баврийну школарттан лавсун бушиву автобусру, ттизаманнул обрудование, буллай бушиву цIусса школартту, бакьин буллай бушиву бухсса школартту.

— Хъинну ххарину бура ттула аьзиз­сса Лакрал район вай проектирдаву чялишсса гьурттушинна дуллай душиврия. ДакIнихтуну барчаллагьрай бура райондалул бакIчи Юсуп МахIаммадовлуйн, цанчирча ванал хIарачатрацIух хъанай дуну тIий райондалий хъинчулийннай­сса дахханашиннарду.
Хаснува барчаллагь чивияв школалул педагогтурахь, вайннал захIматрайну Лакрал район ду­ккавриву хьхьичIунсса ххуттай душиврухлу, — увкунни Зарема Бу­ттаевал.
Цалчинмур классравун наниминналгу ххари бунни цинявппа, школалухасса ва учительтурахасса назмурду пасихIну ккалай, байбихьулул кIулшивурттал ххуйсса гьану бушиву ккаккан бунни.