Август зурул 29-нний Ккуллал райондалул Культурал къатраву хьунни гьарца шинал дуккаврил шин дайдишин хьхьичI шайсса учительтурал совещание.
Микку гьуртту хъанай бия: Ккуллал райондалул бакIчи, Шамил Рамазанов, ванал хъиривчу Анатолий Давдиев, райондалул КIулшиву дулаврил управлениялул каялувчи Камил ТIилиев, школарттал директортал, завучтал ва чIявусса учительтал.
[dropcap]Б[/dropcap]айбихьулий гьарта-гьарзасса ихтилат бувна райондалул бакIчинал. Гьай-гьай, ванал цалчин цинявннахьрагу барча дуруна дуккаврил шин. Цала ихтилатраву ванал кIицI лавгуна ххуйми ва ххуйну ччими масъалартту. Буруккинттарай ия ва мукуна райондалул школарттай дуклаки оьрчIру шиная шинайн чан хъанай бушивриягу.
Хъирив ихтилат бувсса ТIилиев Камиллул бувсуна дуккаврил стандартру щаллу даврил чулиннайсса тIалавшиннардия ва гьаз бувна кIулшиву дулаврил даврицIун бавхIусса цайми-цайми масъаларттугу.
Махъру лавхъуна ялагу Ккуллал 1-мур школалул завуч Рамазан Маммаевлул, ЧIяйннал школалул директор Альбина ХIаммакуевал, Ваччиял оьрчIал багърал каялувчи Асват Чупалаевал. Муния махъ оьрчIан кIулшиву дулавриву хьхьичIуннайшивуртту дурсса учительтуран дуллуна грамотартту.