«Человеческий капитал» хьхьичIунсса проектрал подпроект «Здоровый Дагестан» цукун зий бурив ххалбансса мурадрай, вай гьантрай Лакрал райондалул администрациялул бакIчи Абакар Къюннуев ялтту увккунни райондалул азарханалул.

Зулайхат Тахакьаева
Микку цIанасса чIумал капитальныйсса ремонт дуллай бур рентген бишай кабинетравугу, хирургиялул ва инфекционный отделенияр­ттавугу. «Развитие здравоохранения» тIисса Аьрасатнал паччахIлугърал программалущал бавкьуну, Лакрал райондалул больницалул кьамул дурну дур агьалинан медициналул кумаг баврил, амбулаториялул ва поликлиникалул къуллугърал даву хьхьичIуннай дансса, идаралул материально-техническая база цIубуккан бансса план. МуницIун бавкьуну больницалий дурну дур ремонтрал диялсса давуртту: бакьин бувну бур бухгалтериялул ва статуправлениялул кабинет­ру; тIивтIуну бур лечебная физкультуралул зал; «Модернизация» программалий больницалун дуркIсса цIусса медициналул оборудование ишлану дур щаллуну; жагьилсса пишакартал бучIан бувну, цIубувну бур медициналул зузалт. Больницалул хъунама хIакин АьбдурахIин Дибиров чIявусса мурадру цала сипталийну дузрайн буккан буллай ур. Райондалул цIуллу-сагъшиву дуру­ччавриву хъанахъисса ххуйчулийннайсса дахханашиннардая райондалул агьали рязину бур.
Абакар Къюннуевлул барчаллагь увкунни хъунама хIакиннахь, кутIасса чIумул мутталий хьун дурсса ххуйчулийннайсса давур­ттахлу, бувсунни гихуннайсса давурттаву райондалул администрация шайссаксса чIарав бацIантIишиву.