[dropcap]И[/dropcap]юльданул махъра-махъсса алхIат кьини Аьрасатнаву кIицI лагай Аьрали ва Хьхьирил Флотрал Кьини. Махъсса зурдардий Каспийскаллал шагьрулул аьрали комиссарну ухьурчагу, утти­нинмур оьрмулул ххуллу хьхьирил флотрацIун бавхIусса,

 щиналу­сса жамилий (подводный лодкалий) цикссагу хьхьурду ва кьинирду дирчусса, Шихаьлил арс Геннадий Кьурбановлулгу пишалул байран хъанай дур ва.

Аьрали ва Хьхьирил Флотрал Кьинилул хьунийн

Бадрижамал Аьлиева
Цалчинмур ранграл капитан, дунияллул океандалул личIи-личIисса регионнайсса 4 аьра­ли къуллугърал гьурттучи, ляличIисса аьрали бутIрал ветеран Геннадий Кьурбановлул цикссагу дур паччахIлугърал наградартту. Амма ванал цала яла хъуними бахшиширттан хIисав дувай бавкьусса нахIусса кулпат ва дакIнил ларсъсса даву.
Геннадий Кьурбанов увну ур 1960-ку шинал Таджикис­ттаннай, Душанбай шагьрулий, КIундиннал шяравасса Ших­аьлил ва ПатIиматлул кулпат­раву. Ватандалия архну бунугу, вайннал кулпат чIявуну бияйсса бивкIун бур буттал шяравун – КIундив. Геннадий чIи­винияцIакула ивкIун ур чурххал итххявхсса, спортрахун агьсса, ларсун дур спортрал мастернал цIа.

Таджикисттаннал цачIун дур командалуву гьуртту шай­сса ивкIун ур лачIун буккаврил личIи-личIисса бяст-ччаллавух. Агьну ивкIун ур мотогонкардахунгу. Школалий цахьра тарихрал дарсру дихьлахьисса Рафаэль Павловичлул маслихIатрайн-насихIатрайн бувну, цалва оьрму хьхьирицIун бахIин пикри бувну бур Геннадийл. Школа къуртал бувсса чIава жагьил лавгун ур Архмур Востокрайн, увххун ур Тихоокеандалул Лаваймур Аьрая­ллил ва Хьхьирил училищалийн. Мичча дайдирхьуну дур жагьилнал хьхьирищал­сса дусшиву.

[pullquote]Хьхьирил капитаннал кулпатрал цIа сийлийсса духьурчагу, ларсун бачин хъинну захIматсса дур.[/pullquote]

Училищалий дуклакисса ппурттувугу курсант Геннадий Кьурбанов ивкIун ур язиминнал кьюкьлуву. Дуккаву щаллу хьуну махъ лейтенант Кьурбанов тIайла увккун ур Ухссавнил Флотрайн, Мурманскаллал областьрайсса Ведяево поселокрайн, щиналусса жамилий къуллугъ буллан. Къуллугъ буллай 3 шин хьуну ивтун ур командирнал кIилчинма хъиривчуну. Ва хьуну бур ва дивизиялул тарихраву цалчинсса ишну, ванилгу кка­ккан буллай бур цуксса бусраврай ва сийлий ивкIссарив Геннадий каялувшиндарал итталу ва архIалминнал дянив.

ЦIуллу-сагъшиврун, оьрмулун нигьачIисса ишругу чанну къавхьуну бур ванал къуллугъ буллалиссаксса шиннардий, хьхьири бур хьхьири, хъиривсса лахIзалий ци зий бу­ккавив, ци хIалданий бикIавив къакIулсса. Ца мукунсса ишираву бунияласса цIунцIия хьуну, цаппарасса хIаллай Геннадий зий ивкIун ур лабораториялул начальникну, штабрал начальникну. 1984 шинал тIайла ув­ккун ур Ухссавнил Флотрал атомрал ракетарттал жамирдал 9-мур эскадралул штабрал начальникнал хъунама кумагчину зун, му эскадралувунгу бухлай бивкIун бур шанма дивизия. Шиннардивун ивтун ур Ведяевс­кий райондалийсса базированиялул штабрал начальникнал хъиривчуну. Махъ зий ивкIун ур цайми-цаймигу къуллугъирттай, миннувасса цагу – Северодвинск шагьрулийсса штабрал начальникнал хъиривчунал къуллугъ.

[pullquote]Хьхьири бур хьхьири, хъиривсса мутталий ци зий буккавив, ци хIалданий бикIавив къакIулсса.[/pullquote]

2004-ку шинал ванан дуллуну дур 1-мур ранграл капитаннал цIа.
ХьхьичIвагу, уттигу чIявусса инсантурая баяй Геннадий Кьурбановлул цанма личIи-личIисса иширттаву цимилгу кумаг бувссар, чIарав авцIуссар тIий. Хаснува бусраври ватандалия архний, чIарах бацIанми бакъани бувсса ка-кумаг. Ванал хъирив лавгун, цикссагу жагьилтурал цалва оьрмурду хьхьирийсса къуллугъран хас бувссар.
Геннадий хьхьирий, аьрщарая цимирагу километралул куртIну, щиналу къуллугъ буллай, цимирагу нюжмардий, зурдардий му учIаннин ялугьлай, ичIаллилссагу, оьрчIалссагу баврил хъуннасса хъар цийнна ларсун, къабигьану бивкIссар вай шиннардий мунал кулпатран ПатIиматлунгу. Хьхьирил капитаннал кулпатрал цIа сий дусса дунугу, ларсун бачин захIматсса дур. Амма му бигар ПатIиматлул хъинну ххуйну щаллу бувну бур. Къатта-къушлилсса баврий гьашиву къадурну, ПатIимат къуллугъгу буллай бивкIссар Мурманскаллал ва Архангельскаллал областирдай личIи-личIисса бутIраву, 1988-ку шиная 2016-ку шинайн бияннин.

[dropcap]В[/dropcap]анил даву хъунмурчIин дархIуну диркIссар строевой бутIлул «делопроизводствалуцIун». Къуллугъ бувссар, матроснал цIания тIайла хьуну, «главный старшинанал» чиндалийн бияннин. 2016-ку шинал кьабивтссар къуллугъ. ПатIиматлул хIалал дурссар къачансса наградартту ва цIарду.
Геннадийл ва ПатIиматлул дянив хьуну бур шанма оьрчI: душру Аьйша, Марианна ва арс Руслан. Вай шамунналагу язи бувгьуну бур хIакинналмур пиша. Аьйша чIивинийва, цув ккарччал хIакин хьунна тIий, ичIуваминнал кьацIру тIитIин буллай, ккарччив ккалай, цIуцIисса затрагу дакъарив цIухлай бикIайсса бивкIун бур. ЧIиви душнил тIуркIу, хъунма хьувкун, бунияласса пишалийн кIура бавну бур. ЦIанакул Аьйша Дагъусттаннай, Марианна Москавлив зий бур цалла дакIурдил лавсъсса пишардай. Хъуними ссурваврал ххуллу язи бувгьуну, Руслангу цIанасса чIумал дуклай ур Дагъусттаннал медициналул университетраву. Геннадийл ва ПатIиматлул бур кIива душнил оьрчIгу. Вай хъинну рязийну бур цала куявтураягу – кIира ларайсса кIулшиву дусса усттарсса заргал БуттахIажиев ХIажиная ва ккарччал хIакин Каирбеков МахIачлуя.

Арснал Русланнул школа къуртал буваннин ялугьлайгу бивкIун, ва ларгсса шинал Кьурбановхъал кулпат бивзунни Дагъусттаннайн. Муниннингу вай чIявуну бучIайссия тарихийсса ватандалийн. Цивппа архну бунугу, вайннал хIура хьун къадиртун дур буттал улклуцIунсса дахIаву.
Ца-кIива махъ вайннал нитти-буттаягу – шяраву махъ нанисса, сийлийсса къушаяту. ПатIиматлул ппу ХуцIаев Надиршагь Лакрал райондалий ва мунил кьатIув чIявучин кIулсса, бусравсса чуври, совет заманнай партиялул къулл­угъирттай, КIундиннал, ЧIарттал ва Шахьуйннал шяраваллал цачIусса колхозрал председательну, махъ школалий дарсру дихьлай ивкIсса. Махъсса шиннардий оьрмулул бугьара хьусса Надиршагь ва ПатIимат гъинттул чIумал буттал шяраву, кIинттул шагьрулий бур. Геннадийл ппу Шихаьли, кару магьирсса муххал ус­ттар, аьпалул хьуну шинну хьуну дур, нину ПатIимат ялапар хъанай бур КIундив.

Каспийск шагьрулул бакI дургьуминначIа ва шагьрулул агьалинал дянив хъунмасса хIурматрай ва сийлий ур цIуну ивтсса военком – Геннадий Кьурбанов. Ванал каялувшиндаралу ва хъун дакъасса чIумул мутталий Каспийскаллал аьрали комиссариатрал уттинин дурунни чIярусса ва агьамсса давуртту.
Ванал цIусса къуллугърая­сса ихтилат буванну чансса махъ. Цалссарив, барча тIий буру Геннадий Кьурбановлухь Аьрали ва Хьхьирил Флотрал Кьини ва чIа тIий буру цIуллушиву, цIу-цIусса ххуй-хъиншивуртту.