Октябрьданул 27-нний Каспийскалий шагьрулул хъунмур биб­лиотекалуву хьунни Дагъусттаннал халкьуннал шаэр Юсуп Хаппалаевлун 100 шин шаврин хас дурсса литературалул вечер. Мунивух гьуртту хьунни шаэрнал даврил уртакьтал ва гъан-маччами, мунащал дусну бивкIми, Энергетический колледжрал студентътал ва шагьрулул школарттал дуклаки оьрчIру.

Бадрижамал Аьлиева
Хъунасса шаэрнал оьрмулул ва творчествалул ххуллурдан хас був­сса мажлисран цIагу дия «У очага мудрой поэзии» тIисса.
Вечер тIиртIунни ЦБС-лул директор, «Матери России» щалагу Аьрасатнал суккушиндарал региондалул отделениялул председатель Таиса МахIаммадовал. Ванил бувсунни Дагъусттаннал халкьу­н_нал шаэр Юсуп Хаппалаевлун ва шинал июньдалул 22-нний хьун най диркIшиву 100 шин. Сулайман Стальскийл цIанийсса литературалул премиялул лауреат, ЗахIматрал ЯтIул Ттугълил ордендалун, «Знак Почета» кIира ордендалун, «За оборону Кавказа», «За доблестный труд в Великой Отечественной войне в 1941-1945 гг.», «Ветеран труда» медальлан, ДАССР-данул Верховный Советрал Президиумрал ХIурматрал грамоталун лайкь хьума. Яла-яларив, оьрчIал, гъан-маччаминнал ва махъсса халкьуннал дакIурдиву абадлийсса ччаву, гъилишиву, миллатрал литературалуву лекъащайсса чани кьабивтма.
Шаэрнал биографиялущал бавтIми кIул бунни шагьрулул 6-мур школалул дуклаки оьрчIал. Бувккунни Юсуп Хаппалаевлул цаятува чивчусса повестьравасса парчри.
«На увну ура Хаппалаевхъал тухумраву дягъинттул.Ттул ттатта ялапар хъанай ивкIун ур 125 шинай, зий ивкIун ур гъаттараха ва аьрщараха, амма цала лахъисса оьрмулий тачIав буттал шяравалу кьадиртун дакъар, хIатта Гъази-Гъумукунгума къалавгун ур. Ттул ппу Рамазан кулпатраву цалчинма оьрчIну лявхъуну ур, Хаппалаевхъал тухумраву тIурча – шамилчинману. Ттул ппу увну шамилчинсса кьини къатта левкьун, лекьрурдалу мунал нину диркIуну дур, цIуну дунияллийн увксса чIивитIу тIурча лявкъуну ур сагъну ца гьантлувун». Бувсунни дуклаки оьрчIал Юсуп Хаппалаевлун оьрмулул 7 шинаву Кьуран ккалан лавхьхьушиву, 10 шинаву тIурча – ичIаллил ва шяраваллил хозяйствалуву дувайсса давуртту дуллан. Оьрмулул 16 шинаву хьуну ур учитель, Лакрал педагогический техникумгу бувккуну.
Вечер дачин дурну бия шагьрулул 2-мур школалий лакку мазрал дарсру дихьлахьисса учитель Анзират АхIмадханова ва ва школалул дуклаки оьрчI. Вайннал бувсунни Юсуп Хаппалаев ивкIшиву ххаллилсса таржумачигу, мунал таржума бувшиву Лермонтовлул, Маяковскийл, Хетагуровлул, Стальскийл, ЦIадассал ва чIявусса цайминнал чивчумур. Бувсунни мунал дурсса таржумарттайн бувну, лакрал буккулт кIул хьушиву армяннал, гуржиял ва цаймигу миллатирттал эпосирттащал. Цамуния гъалгъа къатIий, гуржиял литературалул классик Шота Руставелил «ЦIиникьрал луттиравусса нарт» поэмалул таржумалул ялув зий Юсуп Рамазановичлул дурну дур 20 шин.
Юсуп Хаппалаевлул къуртал бувну бур Москавлив М. Горькийл цIанийсса Литературалул институтрачIасса литературалул лавайсса курсру. Мунал цалчин­сса сборник дунияллийн бувккун бур 1940 шинал. Муния махъ дуниял ккарккун дур мунал чIявусса луттирдан. Лакку мазрая оьрус мазрайн Хаппалаевлул назмурду таржума дурну дур Я. Козловскийл, Н. Гребневлул, Н. Соколовлул, Я. Хелемскийл, И. Озеровал, В. Державиннул ва мукунма цаймигу му­къул цIанихсса усттартурал.
Литературалул вечерданий гьуртту хьусса шагьрулул школардал дуклаки оьрчIал дурккунни шаэрнал назмурду лакку ва оьрус мазурдий, увкунни балайрду, ккаккан бунни мунал произведениярттайн був­сса сценка.
Шаэрнал арс, Энергетический колледжрал директор Арслан Хаппалаевлул бувсунни ванияр цаппарасса шиннардил хьхьичI тIивтIушиву Юсуп Хаппалаевлул цIанийсса фонд. Му фонд сакин бувну бур Хаппалаевхъал кулпатрал, гьунар бусса жагьилтурал чIарав бацIаву мурадрай. Гьарца шинал Ю. Хаппалаевлул цIанийсса фондрал дулайссар 3 премия яла итххявхсса шаэртуран ва чичултран, фондрал аьм­сса лагру дур 300 азарда къуруш. Аслан Хаппалаевлул барчаллагь увкунни Таиса Билаловнахь ва вечер ххуйсса даражалий сакин даврихлу.
Махъ лавхъунни шаэрнал душ, «Зунттал хъами» журналданул жаваблувсса секретарь Аьжа АьбдурахIмановалгу. Цилва ихтилатраву мунил кIицI лавгунни ппу чIявусса бакIрачIан бувкIун, цикссагу затру бувхIусса унугу, мудангу цаманан кумагран учIан хIадурсса, зунттал чувнал хасият­рал язими лишаннайн хаин къавхьусса инсан ивкIшиву.
Юсуп Хаппалаев кIулну ивкI­сса Дагъусттаннал халкьуннал шаэр Ссугъури Увайсовлул кIидарчIунни бавтIминнащал мунаясса дакIнийнбичавуртту.
Ихтилатру мукунма бунни «Зунттал хъами» журналданул хъунмур редактор Наида Каримовал, Дагъусттаннал халкьуннал шаэр Космина Исрапиловал, Каспийскаллал медициналул училищалул преподаватель ХасмахIаммад Мустапаевлул, АхIмадхан Султаннул цIанийсса МахIачкъалаллал аэропортрал пресс-службалул вакил Алексей ХIажиевлул, Каспийскаллал шагьрулул КIулшиву дулаврил управлениялул хьхьичIунсса пишакар Тамара Аьлиевал, шагьрулул 6-мур школалул учитель Сайранат Аьбдуллаевал.
Литературалул вечер къуртал хьуну махъ му хIадур давриву хьхьичIунну гьуртту хъанай бивкIминнан дуллунни грамотар­тту. Миннавух бия дуклаки оьрчIру хIадур буллай бивкIсса, школардай оьрчIахь лакку мазрал дарсру дихьлахьисса учительтал Анзират АхIмадханова (2-мур школа), АтIа Ибрагьимова (3-мур ва 9-мур школарду), ва 6-мур школалул литературалул кружокрал каялувчи Сайранат Аьбдуллаева.