Февраль зурул 12-нний Вихьуллал оьрчIал багъравун хъамалу бувкIун бия Ккуллал райондалийсса ряхвагу оьрчIал багърал бакIчитал, оьрчIал тарбиячитал ва УО-лул пишакар. Хъамалу бувкIминнавух бия Исякьова ПатIимат (Ккул), Чупалаева Асват (Ваччи), Камалова Ирина (ЧIяйми), Рамазанова Людмила (Хъусращи),
ХIусайнова Залихха (Вихьул),МахIаммадова Анжела (Хъювхъи), КьурбанмахIаммадова Самиргижан (ЧIяйми), Апанниева Мариян (Ваччи), ХIусайнова Ира, Шамххалова (Ккул), Чабаева (Хъусращи), ХIасниева Лиана.

ХIажимурад ХIусайнов
ОьрчIахь га кьини дарс дихьлай бия Вихьуллал оьрчIал багърал тарбиячи АхIмадова Ххассу. Дарс хас дурну дия ичIаллил хIайвантран ва вахIшисса жанавартран. Дарс дайдирхьуна кIичIираву ци чIун дуссарив, цумур барз буссарив оьрчIахь цIухлахисса суаллайну. Кару гьаз дуллай, оьрчIал бувсуна цIана кIичIираву бушиву февраль барз, чIал дакъа хьунтIишиву 23-мур февральданул кьинисса Аьралуннал байран, кIичIираву дяркъу душиврийн бувну, лаххан аьркиншиву гъилисса лаххия, дахIин аьркиншиву ссурссулухух шарп, бишин аьркиншиву гъилисса кьяпа, кIичIиравух нанийни, микIирай ччех къабикIан, мугъаятну бачин аьркиншиву. Бувсуна оьрчIал цуша кIинттул цила хьхьуцанттуву, хьхьичIмур ччангу кьацIливу дирхьуну, гания цIупIа тIий, инт дучIаннин шанан бикIайшиву. Гайми вахIшисса жанавартран кIи чIарах дукканнин, ккашил къахьуншиврул, инсантурал кIинттул вацIравун дукия дичайшиву, ххулув, канцкорма, чIикIунтIа ва цаймигу дукия. ИчIаллил хIайвант кIинттул инсантурал цала шаппа, хасну гайннунма тIий бувсса ппаллаву, ябайшиву дукиягу дичлай. Бувсуна оьрчIал оьлил накI дулайшиву, гайннуя барт, нагь-нис дувайшиву. Яттил ппал дулайшиву, гайннуя ххаллу дурну, гъилисса янна-ка дувайшиву.
Хъирив оьрчIащал бувна тIур­кIулул лагрулийсса, ичIаллил хIайвант ва вахIшисса жанаварт суратирттай ккаккан буллай, гайннун цIарду оьрчIахь цIухлахисса викториналул лагрулийсса тIуркIу. Хьуна цаймигу тIуркIурду. Дарсирал ахирданий оьрчIал ккаккан дурна ххуйсса концерт. Увкуна балайрду, дурккуна дикломацияртту, бивзуна къавтIун.
Дарсирал ххуйшиву ци дия учирча, циняв оьрчI-душру ларххун бия Вихьуллал жяматран хасъсса яннарду. Дарс ххуйну дишаврил жям дурхьунссия шиккун гьуртту хьун, дарс дишаврил лаг­рулух буруган бувкIминнал. Ттула чулуха кIицI буван ччива: хъинну ххуйну лахьхьин дурну дия, жула лагмасса тIабиаьтравусса жанавартрал, ичIаллил хIайвантрал цIарду дакъагу, гайннуя цукун­сса хайр буссарив ва гайннул цукунсса хасиятру дуссарив. Цилла даврил гьарта-гьарзасса кIулшиву оьрчIащал кIидачIлачIисса тарбиячи АхIмадова Ххассухь на барчаллагь тIиссара. ЧIалай бия жулва оьрчIру ххуйну тарбия буллай бушиву ва тарбиячинал. Укун чIавасса чIумала оьрчIал аькьлу-кIулшилул луртама хIасул даву, гьай-гьай, гания махъ школалий дуклан, гихуннай­сса кIулшиву ласун оьрчIан бигьану бикIайшиву аьлтта чIалачIисса зат бур. Га кьинисса АхIмадова Хха­ссул мюрщултрахь дирхьусса дарс, ца гайннахьралу дирхьусса къархьуну, ганил дарсирах вичIидишин бувкIсса бугьараминнансса дарснугу хьуна. ЧIяву хьуннав укунсса тарбиячитал жулва оьрчIачIа.