Декабрь зурул 12-нний МахIачкъалалив, Оьруснал драмтеатрданул залдануву хьунни Дагъусттаннал халкьуннал чичу АхIмадхан Абу- Бакардун 85 шин шаврил юбилейрал мажлис. Микку гьуртту хьунни Дагъусттаннал БакIчи Рамазан АьбдуллатIипов, Халкьуннал Собраниялул председатель Хизри Шихсяидов ва ХIукуматрал председатель Аьбдуссамад ХIамидов.
П. Рамазанова
Мероприятиялул дайдихьу дуллалисса махъ лахълай, премьер-министрнал кIицI лавгунни АхIмадхан Абу-Бакар ва мунал творчество дагъусттаннал литература хьхьичIуннай шавриву эпохану хъанахъишиву. «Чичул жунма кьабивтунни хIакьинусса кьинигу агьамшиву яла къалагайсса, куртIсса произведенияртту. Ванал луттирду личIи-личIисса никирал инсантуран бусравну ва ххирану бур, ми чIявусса мазурдийн таржума бувну бур. Чичул поэзия, проза ва драматургия ватандалухсса ччаврил вибувцIуну бур, тIайламунийнсса хьул, инсантурайнсса вихшала хьхьичIунми темарду дур мунал творчествалуву. АхIмадхан Абу-Бакар цувагу литературалул тарихравун агьссар цалва миллатрал культуралул вакил – цIанихсса творчествалул личность хIисаврай. Гьаманки ванал творчествалияр дайдирхьусса Дагъусттаннал художественный кинематографрал эпоха. Ванал сценариярдайн бувну чIярусса кинорду ларсъссар Дагъусттаннал ляличIисса билаят ххуйчулий ккаккан буллалисса. Чичул хъунмасса бутIа бивхьуссар дагъусттаннал драматургия гьаз дувавривугу, му авторсса 8 пьеса хIакьинусса кьинигу театрдал репертуардануву буссар», — увкуна Аьбдуссамад ХIамидовлул. Ванал дакIнийн бувтуна СССР-данул халкьуннал драматургиялул фестивальданий «Иди и найдёшь» тIисса пьесалухлу АхIмадхан Абу- Бакардун СССР-данул Чичултрал союзрал ва Культуралул министерствалул цалчинмур премия дуллуну диркIшиву. Бувсуна чичу цаймигу бюхттулсса наградарттан лайкь хьушиву. Чичул творчествалун бюхттулсса кьимат бишлашисса ихтилатру бувна Дагъусттаннал паччахIлугърал университетрал ректор Муртазааьли Рабадановлул, Дахадаевский райондалул хъунама Жаруллагь Оьмаровлул, Халкьуннал Мажлисрал депутат Людмила Авшалумовал, халкьуннал чичу МахIаммад-Расул Расуловлул ва цаймигу бусравсса инсантурал. Мероприятиялул концертрал программалий гьуртту хьуна Дагъусттаннал халкьуннал балайчи Лариса ХIажиевагу. Тамашачитурал, муданма кунма, гурсса хъатру ришлай кьамулгу бувна, тIайлагу бувккуна жулва Лариса. Ччимур миллатрал хьхьичIун, ччимур публикалул хьхьичIун бувккун, лакрал цIа-кьини бюхттул дуллалисса гьунар бусса балайчи.
Юбилейрал мажлисрай гьуртту хьуна Дагъусттаннал культуралул министр Зарема Буттаева ва МахIачкъалаллал мэр Муса Мусаев.
