Октябрь зурул 7-нний Ккуллал райондалийсса Хъювхъиял шяраву хьунни райондалийсса циняв шяраваллу гьуртту хьусса фольклорданул фестиваль. Балайрду учаврил, къавтIавуртту ккаккан даврил фестиваль ххал дуван ва мукунма жулва аслийсса къатта-къушлийсса кушурдащал, ишла дуллалисса матахIращал, лакрал материал культуралущал кIул хьун увкIун бия ва кьини Ккуллал райондалийн Москавлиясса 10 журналист. Вай хасну так жулла райондалийн бувкIун бакъаяча, ца­ппара шагьрурдал, районнал ялтту бувккун, Дагъусттаннал культуралия, шиккусса инсантурал сакиншиндарая Аьрасатнал халкьуннахь бусансса нижатрай бувкIун бия.

ХIажимурад ХIусайнов
ЖучIанма бияннин вай бивну бия Дарбантлив, Дахадаевуллал райондалийн, гьантIий бия Гъуниннал, Къумтуркъалаллал, Ахъушиял районнайн. Укунсса дия вайннал Дагъусттаннайн бучIаврил программа. Миннавух бия. Михаил Кожухов – Аьрасатнал телевидениялул кIилчинмур каналданий жуна ххал шайсса кинопутешественник, Александр Петросян – «Огонек» журналданул фотокорреспондент, Мария Черноховская – «Дискавери» журналданул корреспондент, Елена Остажьева – «Уютное небо» журналданул корреспондент, Ярослав Коробатов – «Комсомольская правда» кказитрал корреспондент, Игорь Стамахин – «Страна ру.» сайт­рал корреспондент, Ольга Чижкова – «Отдых в России» журналданул корреспондент, Мария Вылежнева – «Интерфаксрал» корреспондент, Кирил Сидоров – «Вокруг света» журналданул корреспондент, Дина Карпицкая – «Московский комсомолец» кказитрал корреспондент. Вайннащал ия Дагъусттаннал печатрал ва информациялул министр­нал хъиривчу Зубайру Зубайруев ва цаппара Дагъусттаннал журналисталгу.
Фестиваль най дия Хъювхъиял шяравусса «Щунудагъ» фестиваллу дувайсса амфитеатрданул сахIналий ва хIаятраву. ХIаятраву райондалул ацIния мукьрагу шяраваллил чятирдаву дирхьуну дия цанна-цанна хасъсса касмурдайну дувайсса ичIаллил тIахIни-кIичIу, дукрарду ва шяраваллал культуралул зузалт бия хъинну чIюлусса, нитти-буттахъал лахлай бивкIсса, яннардаву. Хъамаллуран кка­ккан дуруна хасну шяраваллал инсантурал оьрмулуву хъунмасса кIану бугьлагьисса касмурдайну дуваймур. Му ккаккан дуллай, хъамаллуращал занай ия Ккуллал райондалул бакIчи Сяид Сулайманов ва Ккуллал райондалул администрациялул иширтталсса буваймур Надежда ХIажиева.
Хъусращиял ккаккан бувуна кIарттул ччатI шашайсса кIара цукун бувайссарив ва нувщуй каза бувайсса куц; Ккуллал – щяв дутайсса хъа щащайсса куц ва баркьут буруххайсса куц; СумбатIуллал – канил нигьирттай хъувухъу бувайсса куц; 1-мур ЦIувкIуллал – нувцIуй къама бищайсса куц; Ваччиял – буттукьри бувайсса ва канил машиналий лаххияртту дувайсса куц; ЧIяйннал – гъунттуй зини-ччатI кьакьан байсса куц; Хъюйннал – бархъаллал урша бищаву ва дуссух щябивкIний ци дуллан бикIайссарив; ЦIуйшиял – ккутI дусса чаривух буккан буллай, лу кIикIайсса куц; Вихьуллал – варси бувайсса ва урхьлулу дихьу щащай­сса куц; Ссухъиящиял – карщул нис дувайсса куц; Къяннал – къалай дуккайсса ва янна дуруххайсса куц; Хъювхъиял – кIанттуву цалчин оьрчI бахIайсса куц; ЦIущардал – хъурзилтту щащайсса куц; 2-мур ЦIувкIуллал – чIатулттив бахIайсса ва тIаннул къусри дувайсса куц. Вай циняв затру ласлай бия суратирттайн ва кинордайн жучIанма бувкIсса хъамал.
Хъамал ми циняв чятирдал ял­тту буккайхту, дайдирхьуна балайрдал ва къавтIавурттал фестиваль. Ва даву дачин дурну ия Ккуллал райондалул бакIчинал маслихIатчи ва пресс-секретарь Хизриев Шам­ххал. СахIналийн бувккуна цалчин МахIачкъалаллал циркирал школалул АсхIабаьли ХIасановлул канилусса хьхьуттайх лахъай пагьламантал. Вайннал хъирив балайрду увкуна Хъусращатусса Зульфия Даллаевал, Юлиана Даллаевал, Дагъусттаннал лайкь хьусса артистка РайхIанат ХIажиевал, Гриша Ванатиевлул, райондалул Аьрасатнал халкьуннал аслийсса культуралул центрданул зузала ХIабибуллагь Кьурбановлул, Ваччиял Культуралул центрданул зузала Муслим Суллуевлул, Ссу­хъиящиял Аьрасатнал халкьуннал аслийсса культуралул центрданул бакIчи Оьма­риев ХIасайнил. КъавтIавуртту ккаккан дурна Вихьуллал школалул, Ккуллал 2-мур школалул, ЧIяйннал школалул душварал, райондалул Аьрасатнал халкьуннал аслийсса культуралул центрданул коллективрал, ва цайми-цайминналгу. Вихьуллал шяраваллил культуралул зузалтрал «Ссапа» тIисса къавтIаву ккаккан дуруна.
Балайрду увкуна. ЧIяйннал шяравасса полициялул зузала Рустам СIутаевлул, Хъювхъиял школалул дуклаки оьрчI Аьлибек Кьурбановлул, Къяннал шяравасса фестивальданул яла чIавама гьурттучи Самсали Ибрагьимовлул, СумбатIуллал шяравасса ПатIимат Каптаровал, Аьрасатнавух цIа ларг­сса Хъювхъиял шяравасса АхIмад АхIмадовлул ниттил СултIанат АхIмадовал, Ккуллал шяравасса Саманият Аьлиевал, ЦIуйшиял шяравасса АхIмад АхIмадовлул, СултIанат Мусаевал, чIавасса МахIарам ЦIаххаевлул ва м.ц.. СахIналий ва ванил хьхьичIсса аьмсса къавтIавурттайну къуртал хьуна фестиваль.
Муния махъ хъамаллурал, хьхьичI­ва хIадур бувсса, балчантрай чан-кьансса Хъювхъиял ххуллурдайх ва лухччайх гайзру бувна.
ТIайламур бусан, макьалалуву кIицI увсса Михаил Кожухов, аьпалухьхьун лавгсса Юрий Сенкевич, тIабиаьтрал жанаварт­рая бусайсса Николай Дроздов хьуннав, бувкIун ччан бикIайва ттун жула Дагъусттаннайн, жувагу Аьрасатнал ца бутIану хъанахъикун. Дурхха жува яхъанахъисса кIанттайгу Аьрасатнал инсантурахь бусан багьлагьи­сса хъинну ххуйсса аьдатру, тIул-хасиятру, тIабиаьт, ххяххияртту, вахIшийсса жанаварт буруччин багьлагьисса буруккинтту. Улу, жучIара яхьуну дур хIакьинугу иникьали дуван къама гьаяйсса щинай зузисса гьарахъалугума. Мукунсса гьарахъалу дур ЦIуйшиял шяраву. Умуд бур мукьахунмайгу, ца Москавлиясса бакъа, цайми субъектирдаясса журналистал жучIанма букIлай, жувагу дунияллий бушиврияту бусланссар тIисса.