![](http://ilchi.beget.tech/wp-content/uploads/2019/12/jhguyjkuyk-150x150.jpg)
уртакьтуращал
Гьунар бусса жагьилсса аьлимтурал кьюкьлувун ласун лайкь хьунни Дагъусттаннал педагогтурал даража лахъ бавриха зузисса институтрал пишакар,ЧIяйннал шяраватусса МахIаммадрашидлул душ Рамазанова Залина. Ванил дурурччуну дур цIана школарттай жула учительтуран хъинну дучIи лякъинтIисса, уттизаманнул тIалавшиннардугу хIисавравун ларсъсса, «Тарбиялул ва кIулшивуртту дулаврил теория ва методика» тIисса диссертациялул даву.
Залму АьбдурахIманова
[dropcap]Б[/dropcap]увну бур Залина МахIачкъалалив. Ванил ппу Багъатиров МахIаммадрашидлул чIярусса шиннур МахIачкъалаллал горгазрай зий. Ппу жаваблувсса давурттайх уну, Залиналгу, ванил кIивагу ссилгу тарбиялулмургу, къатта-къуш бачин баврилмургу хъар вайннал нину Караванил цийнна ларсун бивкIун бур.
![](http://ilchi.beget.tech/wp-content/uploads/2019/12/hhu67u67i-150x150.jpg)
Инсаннаву ца гьунар буни, цайми гьунарду бакъагу къабикIайхха. Залинавугу къавтIавурттахмур ччавугу къачансса диркIун дур. КъавтIий бивкIун бур ва жула республикалий цIа ларгсса «Асса» тIисса хореографиялул ансамбльдануву ва мунил хъирив машгьурсса «Лезгинка» ансамбльданул хореографиялул студиялийн занай бивкIун бур. Шикку Залина лайкь хьуну бур марцIну ххювардай къуртал бувсса хореографнал дипломран. Мунищал архIал мусил медальданий МахIачкъалаллал 31-мур школагу къуртал бувну, дуклан бувххун бур Дагъусттаннал педагогикалул университетрал чил мазурдил факультетрайн.
ЯтIул дипломращал мугу къуртал бувну, 2004 шиная шинмай Залина Дагъусттаннал педагогтурал кIулшивурттал даража лахъ бавриха зузисса институтраву чил мазурдил факультетрал хъунмур преподавательну зий бур. Зузиссаксса хIаллай Залинал, хIадургу бувну, итабавкьуну бур кIулшивуртту дулаврил идарарттай чил мазурдил учительтурал ккураннаву сий дусса ва ишласса ттуршунния ливчусса методикалул пособияртту ва элмийсса давуртту. Гьар шинах ва гьуртту шай халкьуннал дянивсса конференциярттай, личIи-личIисса шагьрурдай батIайсса семинардай.
Цила даврил минахур бакъассагу, Залина бур хIалимсса, дакI хъинсса, багьайкунсса аякьа дан кIулсса нину ва кулпатгу. Ванил лас Рамазанов МахIаммад МахIачкъалаллал 1-мур азарханалий хирургну зий ур.
ЧIа учин ччай бур Залинан вания гихунмайгу тIайлабацIуртту ва лахъшивуртту.