![](http://ilchi.beget.tech/wp-content/uploads/2019/12/hfhjtyjkty-150x150.jpg)
ттуруллив
[dropcap]Ч[/dropcap]чясса, ссят ряхра хьусса кьинилул дайдихьу. Ва чIумал зунттаву дахьра чани хъанахъисса чIун дикIай.
[dropcap]Н[/dropcap]а даврийн Ваччав ачайхту, гъурса тIий уссала баллалисса марххалттанул чIунил ца тIааьнсса асар чурххавун бутлай бия. Шярава увккун, ЧарицIалу тIисса ххуллийх ачайхту, чани хъанан диркIуна. Лагмасса зунттурдал санчиннугу яргну, дурагу ттуруллул къурхъ дакъасса ссавнилу караматну чIалай дия.
ХъарттайратIув ияйхту, цакуну архний, Ккул-Хъусрал лагмасса зунттурдаяргу лахъну, ца тий, ца ший чIалачIисса лухIисса кIива «зунтту» янилун багьуна. Вагь, та ци караматривав, ца хьхьунил лагрулий тай зунттурду хьусса тIисса затгу дакIнивун бувххуна. Амма, цахъис ххуллу бивтун, Майрайх ялавай ачайхту, «зунттурду» ппив хъанай бавчуна – ххал дарча, тай ттуруллив диркIун дия. ЧIал къавхьуну архния бувккун нанисса бургъил, тай ттуруллайх «мангъал» дурккун, дакъа-къатIа дуруна. Баргъ цуппагу Къичурлухиял шяраваллиха ливчуна.
Баргълагавал чулийсса ссавгу мукун чаннану някIну чIалай дияхха, га дирхьусса суратраха лахьлай дия.
Ттун га цIана дакIнийн агьуна Николай Рерих, чичу, суратру дихьу, философ, Индиянавусса Непал тIисса лахъсса зунттавусса кIанайн лавгун, тих яхъанай ивкIсса. Суратругу тай зунттурдалсса дихьлай ивкIссар тIар. Бакъаривла махIатталсса иш? Аьрасатнаву бакъаявав ванан ххуй бизансса кIану? КъакIулну биявав Лакку билаят? Гьай-аман, жува таривав жуламур цIавиркьрах щябикIантIисса?
ЦIуйшиял шяраваллил чIарах увккун, хьуний-ххуллийх ачайхту, бакIрайн багьлан бивкIуна жанавартрал марххалттаний кьабивтсса шару. Гай шанма журалул бия. На авчи акъара, мунияту гай цумур жанавардануллив ттуща зухь бусан къахьунссар.
ЧIяйннал арих ачайхту, ца гъаттарал газу бакIрайн дагьуна, гай ххуллул лувсса ца оьнтIуллуву кIюрххилсса канай бия. Гъаттаран аькьлу бакъассар цукунни учинтIисса? Дукия думур кIанайн, хIухчу хъирив акъанува, цивппа бия бувкIун.
Валлагь-биллагь ва ца кьинилул караматшиврух, исвагьишиврух ябитангума бучIир Лаккуй яхъанан!