Тарбиялул даву ва дуклаки оьрчIру спортрахун машхул буваврил даву ци даражалий дурив ккаккан Дагъусттаннал Минобразованиялул ва Минспортрал уртакьну дунни республикалул конкурс-смотр. Му конкурсрал хIасиллу дуваннин хъинну хъирив лавну ххал диргьуну дур муниципал СДЮСШОР-дай, ДЮСШ-рдай лахьхьин баврил ялувсса давугу, спортравун кIункIу буваву мурадрайсса дакIцIуцIавугу, миккусса хьхьичIуншивурттугу.

ХIакьинусса кьини Дагъус­ттаннай бусса бур оьрчIру спорт­рахун машхул буллалисса 187 школа, мивун занай усса ур аьмну 62176 дуклаки оьрчI. Конкурсрайгу гьуртту хьуну бур 30-нниха ливчусса спортшколартту. Конкурсрал тIалавшиннардайн бувну, спортрал чIярусса мероприятияртту дурсса, райондалул, рес­публикалул, Ккавкказуллал ва Аьрасатнал, мукунма дунияллул халкьуннал соревнованиярттай ва турнирдай хьхьичIунсса кIантту бувгьусса оьрчIру чIявусса ва оьрчIру гъинтнил каникуллай багьайкун бигьалагаврих дагьайкун­сса аякьа дурсса школардан баллугу лахъсса ккаккан буллай бур. Вай цимурцагу хIисавравун ларсун, ЦIуссалакралмур спортшколалун ( ДЮСШ №1), зачетран 4029 баллгу ккаккан бувну, цалчинмур кIану буллуну бур. «Жул райондалул ДЮСШ-лул ва тренертурал-преподавательтурал уттинингу даврил ххуйсса хIасиллу ккаккан дур­ссия, ларгсса шиннардийгу респуб­ликалул спортшколардал дянив жул школагу кьиматрай буссия, жура-журасса соревнованияр­ттай хьхьичIунсса кIанттурду бугьаврийн бувну. Ларгсса шинал Новостройрай тIивтIусса спортшколалулгу лайкьну дурур­ччунни райондалул цIа. Миккугу ЦIуссалакрал 1-мур ДЮСШ-лул коллектив бавкьуну, райондалий спорт гьаз дуван чялишну зий бушиврувур биялагу бусса. Жу дуллалимуницIун райондалул администрациялул хъуниминналгу, нитти-буттахъалгу мудан кабакьай», – тIий ур ЦIуссалакрал ДЮСШ-лул директор Сергей Аьли­мов.