Март зурул 14-нний Дагъусттаннал ПаччахIлугърал университетраву хьунни щалла дунияллул халкьуннал конференция «Парснал ирс-ххазина Ккавкказнаву» цIанилусса. Му хас дурну дия цIа дурксса профессор, филологиялул элмурдал доктор МухIаммад-Нури ХIусмановлул 90 шинал юбилейран.

П. Рамазанова
МухIаммад-Нури ХIус­мановлул цIа къабавсса, къакIулсса акъахьунссар. Машгьурсса иранист, аьраб ва парс мазурдил таржумачи. Мяъна-мурад бувчIин буллалисса комментарияртту дурну цалчин мубараксса Кьуръан таржума бувма.
«Коран: академический перевод и комментарий» тIисса луттирахлу мунан дуллуссия Аьрасатнал Федерациялул ПаччахIлугърал премия.
Аьрасатнал Федерациялул лайкь хьусса элмийсса зузалар. Дунияллул востоковедениялул элмулуву хьхьичIва-хьхьичI «Частотный словарь Унсури» итабавкьумари.
МухIаммад-Нури ХIусманов цимилагу хьуссар «Илчилул» редакциялий. Мунал цIакьсса дусшиву дия цащала дуклай ивксса, лакрал машгьурсса аьлим­чу, Москавуллал университетрал востоковедениялул факультет къуртал бувсса, парс маз ххуйну кIулсса Абачара ХIусайнаевлущал. Му дунияллия лагайхту, дусшиву хIура-чIула дуккан къаритан куна, уххай «Илчилул» хъунама редактор Качар ХIусайнаевачIан.
МухIаммад-Нури ХIус­ма­новлун хас дурсса конференция хIадур дурну дия Дагъусттаннал университетрал ректоратрал Аьрасатнал Федерациялийсса Ираннал республикалул Посольствалущал уртакьну. Тамансса аьлимтал, жяматийсса ишкка­ккулт бия Ираннава, Турциянава, Гуржиянава, Таджиккисттанная, Болгъарнава бувкIсса.
Конференциялул дайдихьу дуллай, чIумуйну ректорнал къуллугъ бартбигьлагьи­сса МахIаммад ХIасановлул кIицI лавгуна МухIаммад-Нури ХIусманов дунияллул литературалуву ва элмулуву цIакьсса цIа личIансса хъуни-хъунисса давурттив дурсса аьлимчу ушиву. Ккаккан дурна аьлимчунал оьрмулиятусса фильм.
Юбиляр барча уллалисса ихтилат бувна Аьрасатнавусса Ираннал Посольствалул вакил Сейид Хосейн Табатабаил. Мунал бувсуна Ираннал Республикалун хас дурсса тамансса мероприятияртту дуллан хIадур хъанай бушиву Аьрасатнаву, мукунма Дагъусттаннайгу. Бувсуна парснал литература пасихIну оьрус мазрайн таржума дуваврихлу МухIаммад-Нури ХIусмановлун Сааьдил цIанийсса Дунияллул Халкьуннал премиягу дуллушиву. МухIаммад-Нури ХIусманов барча уллалисса, кьатIаллил билаятирттая дуркIсса, телег­раммардугу дурккунни. Аьлимчу барча унни Аьрасатнавусса Ираннал вакил Мехди Санаил.
Хъунмасса доклад бунни Ира­ннавасса аьлимчу Аьли Моджанил. Муналмур доклад бия Ираннал ва Ккавкказуллал агьалинал арардая бусласисса.
Заседание къуртал хьуну мукьах студентътурал кьатIаллил билаятирттая бувкIсса хъамал ва аьлимчу дагъусттаннал миллатирттал дукрардал авадансса ссупралухун бувцуну хъамалу бунни.
Яла конференциялул заседанияртту хьунни кIива секциялийх дарчIуну университетрал Элмийсса библиотекалуву. Ца секциялий парснал культуралул ирс-ххазина тарихрал ва культуралул лагрулий ххалбивгьунни, гамур секциялий – филология гьануну ларсун.