ЦIусса шинал байрандалун хасну цIуминалийсса Чапаевкаллал шяравусса «Солнышко» садикрайсса цинявппагу группардаву ларгунни мюрщи оьрчIансса байранну. Аьдатравун дагьсса, мюрщи оьрчIан ххира хьусса байранну дунни ва садикравусса 8 группалуву.
И. Саидова
ХIакьину «Солнышко» садикраву бур 3 группа мюрщими оьрчIру бусса, 2 группа дянивми оьрчIру бусса, 2 группа хъуними оьрчIру бусса ва ца группа школалийн нанисса оьрчIру хIадур бувайсса.
Цинявппагу садикравун заназисса оьрчIащалa утренникирттайн хIадур хъанай, шеърирду лахьлай, балайрду учин ва къавтIун лахьхьин буллай, оьрчIал гьунарду итххяххан буллай хъунмасса захIмат бихьлай бур музыкалул руководитель Надира АхIмадовал.
ЦIусса шинал байран — му хъанай дур мюрщи оьрчIан ляличIинура ххирасса. ЦIусса шинал байран гъан хъанан дикIайхту мюрщи оьрчIащал байранналух ялугьлан бикIай оьрчIал нину-ппугу. Ва байранналийгу садикрал зузалтращал хIала бувххуну, шаймунил кумагру буллай бия оьрчIал нину-ппу.
Садикрайн заназисса цинявппагу оьрчIан нацIу-кьацIурду дусса бахшишру дунни ЦIуссалакрал райондалул бакIчи Айдиев ХIажи Шихамировичлул.
ЦIусса шинал байранналущал оьрчIру барча буван садикрайн бувкIунни гьарица шикку хъанахъисса мероприятиярттай мудангу гьурттушинна дайсса ва чIарав бацIайсса ЦIуссалакрал райондалул администрациялул бакIчинал хъиривчу Алик Исрапилов, ЦIуссалакрал райондалул КIулшивуртту дулаврил управлениялул хъунаманал хъиривчу Светлана Къудаева.
ЦIусса шинал байранналул гьантрай тяхъасса ва шадсса утренникру хIадур дурну дия садикрал тарбиячитурал: Зуайнат Ибрагьимовал, Элионора ХIусайновал, Имара Рамазановал, Эмилия Муслимовал, Зарема Хайдакьовал, Сурая ХIайдаровал, Милана Маммаевал.
Ахирданий садикрал заведующий Оксана Юсуповал оьрчIан талихI, тирхханну ва цIуллушиву чIа тIутIисса ихтилат бунни. Мукунма барчаллагь увкунни цала байран хъун дуван бувкIсса хъамаллурахь, оьрчIру ххари бувсса, миннан бахшишру дурсса ЦIуссалакрал райондалул хъунама ХIажи Айдиевлухь, ЦIусса шинал байрандалущал оьрчIру барча буван нацIу-кьацIурдащал увкIсса МахIачкъалаллал Кировский администрациялий зузисса Арсен Кьурбановлухь, мудангу жула чIарав ацIайсса, аьркинмур щаллу дан ка-кумаг байсса «Новострой» дирекциялул хъунама МахIаммад-Сани Мяндиевлухь.
Мукунма Оксана Юсуповал кIицI лавгунни цинярдагу садикирттай дуллалисса мероприятиярдай чялишсса гьурттушинна дайсса садикрал зузалт Жамиля Исупова, Саида МахIаммадова, Аида Султанова, Рая Кьадиева, Назира Наждуева, Мадина Кьурбанова ва садикрал тарбиячитуращал зузисса, миннал даврил ялув бавцIусса методист-психолог Банавша Кьурбанова.
Шиккува кIицI лаган «Солнышко» садик тIивтIуния шихунмай, кутIасса чIумул мутталий бюхъу-бажар бусса, даврил опыт бусса, жагьилсса пишакар, садикрал заведующий Оксана Юсуповал каялувшиннаралу хIасул хьуну бур ххаллилсса зузалтрал коллектив. Вайннал хъунмасса хIарачатрайну чIюлу бувну бур садик, дурурххуну дур оьрчIал байраннай лаххансса оьрчIи-кIурисса личIи-личIисса костюмру, хIасил бургъил цIа дирзсса садикравун увхсса инсан, баргъ кунма чанна лавхъсса тIювайн бакIрайн агьлай ур.
