Июльданул 14-нний Ккуллал райондалул администрациялул заседания дувай залдануву хьунни хъинну агьамсса, гьарцаннал цалва-цалва пикрирду ашкара буллалисса, Ккуллал райондалийсса школардай ва оьрчIал багъирдаву гъилисса дукрарду дулуншиврул харж дувайсса арцущал дархIусса батIаву.
Школардал директортал ва оьрчIал багъирдал бакIчитал ца зумату кунма: «ХIукуматрал итадакьлакьисса ца оьрчIан цал дукра дулун харж дуван ккаккан дурсса 12,3 къуруш «кIункIу-хъит» дуллай дакъа дузал хъанай дакъар», — тIий бия.
Буниялагу, жулва Дагъусттан циксса авадансса инсантал бусса билаятран ккалли бувайссарив къакIулли, вайксса чансса арцу ккаккан дуллалисса хIукмучитурал. Москавливсса оьрчIан цал ахттайнсса дукан 60 къуруш ккаккан дурну душиврия буслай бур тийх яхъанахъисса уссил-ссил оьрчIру бусса жулва инсантал. Москав авадансса шагьру бур. Тайннал цалва бюджетрава хIукуматрал ккаккан дурми арцуцIун ххи дувайшиву арцу буслай бур. Ккуллал райондалий царагу СПК, КФХ, цавагу таксса ишбажаранчи акъар цалва оьрчIан ахттайнсса дукан хIукуматрал дуллалиминнуцIун къуруш ххи дуван бюхъайсса. Мунияту иш къуманивун багьлай бур. «Яла, махъ, угьара шайхту, бакI зуншиврул витаминну бусса, цайми чурххан аьркинсса микроэлементру бусса дукия аьркинсса чIумал оьрчIан къадулурча, аьлтта чIалай бур жулва оьрчIру къуркъасса хьуншиву», — тIисса ихтилат бувуна ттущал ца оьрчIал багърал хъунмунил. Райондалийсса шяраваллаву дукия хIадур дуван машан ласайсса ччатI, накI, нис, дикI личIи-личIисса багьри бусса душаврийн бувну, финотделданул буллалисса суаллугу чIяву хъанахъишиву буслай бия школардал директортал. Мунийн бувну, райондалул вив цавай багьри ккаккан буварча ххуйну хьунссия тIий бия.
БатIаврий ялагу ххалбигьлай бия школардал оьрмулул масъалартту. ЦIунилгу гьаз бувуна школардай дарсру дихьлахьисса учительтал цIуну тIалав дуллалисса стандартирттащал зун къабюхълахъисса, оьрмулул бугьарами чIявуми компьютердащал зун къаччисса, муния «нигьабусласисса» бушиву. Къанай бусса бия школардайн цIусса специалисталгу. Ва ишираясса буруккинттаясса цалва пикрирду кIибавчIуна цаппара школардал директортурал.
БатIаврий ихтилатру бувуна Ккуллал райондалул бакIчинал хъиривмур Илиясова Сабринал, УО-лул хъунама АхIмадов Шамиллул, финотделданул бакIчи Амучиев Кьурбаннул, шяраваллил хозяйствардал управлениялул хъунама Рамазанов Рустамлул. Гьарта-гьарзасса батIаврий гьаз буллалисса масъаларттан хас бувсса ихтилат ва бувчIин бавуртту дунни Ккуллал райондалул бакIчи Сяид Сулаймановлул. Ва, мукунна, тIалавшинна дуллай ия Дагъусттаннал Президентнал хьхьичIун ласласисса программартту биттур дулланшиврул, шяраваллал бакIчитурал цалла активращал хIасул дуван багьлай бушиву дуллансса давурттал сияхIру ва гай цукун биттур дуван багьлай буссарив ккаккан буваву. БатIаврий ххалбивгьуна цаймигу масъалартту.
