ЦIуссалакрал райондалийсса «Солнышко» тIисса детский садраву хьунни школалийн гьаннинсса оьрчIащал зузиминнал кьинилун хас дурсса мероприятие.
А. Аьбдуллаева
Ссят 10. 00. хьусса чIумал детсадрал музыкальный залданувун бавтIун бия чIюлуну лархсса, ххарисса оьрчIру ва тарбиячитал. Байрандалий гьуртту хьун бувкIун бия ЦIуссалакрал райондалул КIулшивуртту дулаврил управлениялул хъунаманал хъиривчу Светлана Рамазановна ва методист Мисиду Расуловна.
Детский садрал зузалт барча буллалисса ихтилат бунни «Солнышко» садрал заведующая ва методист Оксана Исмяиловал. Детский садрал зузалтран тIайлабацIу чIа тIисса ихтилатру бунни хъамаллуралгу. Хъирив гьарица группалувусса оьрчIал ккаккан дурна садикрал зузалтран хас дурсса авадансса программа. Мюрщи оьрчIал бувккунни шеърирду, увкунни балайрду, ккаккан дунни къавтIавуртту ва инсценировкартту. Ва кьини садикравусса байрандалий яла хIазмур ва асар хьунмур дия «Звезды» тIисса мюрщи оьрчIал ва тарбиячитурал цачIу щаллу дурсса къавтIаву. Му хIадур дурну дия музыкалул зузала Надира Аьбдуллаевнал.
Ахирданий оьрчIал цала тарбиячитал пишалул байрандалущал барча буллалисса тIааьнсса махъругу увкуну, миннан тIутIив ва открыткартту дуллунни.
Зузи кьини къуртал хьуну махъ, ссят ряххунний, садикраву тарбиячитурансса ва цинявппагу зузалтрансса дялахъру хьунни. Программалуву дия личIи-личIисса конкурсру, спортрал бяст-ччаллу, тяхъасса тIуркIурду. Дялахъру къуртал хьуну махъ цинявппа щябивкIунни байрандалул ссупралух.
