Лахъа-хъунну дунни Лакрал райондалий ва базилухгу ОьрчIру буруччаврил кьинилул шадлугъ. Цувгу сакин дурну дия райондалул администрациялул ва КIулшиву дулаврил управлениялул. Чялишсса гьурттушинна муний ялагу дунни райондалул ОьрчIал творчествалул къатлул, ОьрчIал магьирлугърал школалул, райондалул библиотекалул, детсадрал, райондалул магьирлугърал къатлул. ОьрчIал цалва гьунарду ккаккан бунни хъуниминнан, къавтIий, балайрду тIий, назмурду ккалай.
Шадлугъ дачин дурну бия КIулшиву дулаврил управлениялул методист Гьумаюн Аьлиева.
ОьрчIру барча бан бувкIун бия райондалул бакIдургьуми, райондалул администрациялул ва идарарттал зузалт.
ОьрчIру ва миннал нину-ппу барча буллай, Лакрал райондалул бакIчи Юсуп МахIаммадовлул увкуна:
— ОьрчIру буруччаврил кьинилул агьаммур мурад хъуниминнан миннал буруккинттая дакIнийн бутавур, миннал оьрмулул, тархъаншиврул, бигьалагаврил, кIулшиву дулаврил, диндалул ихтиярду дуруччаврия дакIнийн бутавур. ОьрчI талихI бусса изаву, муная жяматран мюнпатрансса инсан уккаву хьхьичIва-хьхьичI нитти-буттал, хъирив школалул ва щалва жяматрал биялалухьсса ишри. Жува жувагу буссияв оьрчIруну. Вай мюрщултрах дурсса къулагъасралгу цалла ахъулсса дулунтIиссар, жяматран мюнпатсса агьлу вайннаягу буккантIиссар.
Шадлугъ наниссаксса хIаллай баян бувну бия асфальтрай сурат дишаврил, назмурду дакIних дуккаврил ва магьрал конкурсру. Миннуй гьуртту хьунни детсадрал мюрщултрая тIайла хьуну, райондалул гьарца школалул дуклаки оьрчIайн бияннин.
Конкурсирдай ххувхьуминнан цила чулуха бахшишру дунни райондалул администрациялул бакIчинал хъиривчу Соня Макьаевал.
ОьрчIру буруччаврил кьинилун хасну райондалул магьирлугърал къатлул зузалтралгу ккаккан дунни концерт.
ОьрчIру буруччаврил кьини ялагу хьунни, шинал лажиндарай най бивкIсса, райондалул школарттал дянивсса, КIулшиву дулаврил управлениялул кубокрансса футболданул турнирданул финал, цувгу дия Хъурхърал, Щардал, Гъумучиял школарттал ва Гъумучиял лицейрал дянив. Ххув хьунни Гъумучиял школалул команда.
