ЦIуссалакрал райондалийсса ЦIуссалакрал 1-мур школалий, «Изучаем родной язык» цIанилу, хьунни ниттил мазрал ва литературалул дарсирдал учительтурал элмийсса ва практикалул конференция.

Му сакин дурну дия райондалул КIулшивуртту дулаврил управлениялул. Конференциялий гьуртту хьунни КIулшивуртту дулаврил управлениялул зузалт, райондалул школардайсса ниттил мазурдил дарсирдал учительтал, райондалул библиотекалий чIярусса шиннардий зий бивкIсса Рукьижат СалихIова, лакку мазрай шеърирду чичлачисса шаэр ХIасанхIусайн Даудов.
КIулшивуртту дулаврил управлениялул методист ПатIимат ХIасановал кIицI лавгунни ва конференция дуллалишиву ДР-лул приоритетсса проектирдавасса «Человеческий капитал» тIимур проектрал «Просвещенный Дагестан» тIимур бутIул лагрулуву, республикалул школарттай ниттил маз лахьхьаву ва ниттил мазрал дарсирдал учительтуралул даража лавай баву мурадрай.
Конференциялул даву дайдирхьунни учительтурал хIадур бувсса докладирттая. Ниттил мазраясса док­лад бувккунни ЦIуссалакрал 1-мур школалул лакку мазрал дарсирдал учительница СалихIат Сайпуллаевал. Цинявппагу шикку буллалисса ихтилатирттал мяъна-мурад бия ниттил мазру кIулну бикIан ва лахьлан аьркиншивриясса.
— Ниттил маз – му жулва пикрирдугу бусайсса, жулла культурагу, тарихгу, багьу-бизугу аьч байсса мазри. Ниттил маз лахьхьаву ва му буруччаву цалчинва цалчин байбишин аьркинссар кулпатирттаву. Цуксса хIайпнугу, махъсса шиннардий чIявуми нину-ппу бур оьрчIан ниттил мазру лахьхьин баврил чулухунмай баччибакъулшивуртту дуллалисса. Нитти-буттал оьрчIан ниттил мазру лахьхьин баврил чулухуннай къулагъас дакъашиврийну, школарттай учительтурангу му лахьхьин буллан хъинну захIматну бур, — увкунни СалихIат Сайпуллаевал.
Аьрасатнал Чичултрал союзрал член, «Соколенок» журналданул редактор, Аьхъардал школалул ниттил мазрал ва оьрус мазрал дарсирдал учительница Сияна ХIажиевал цилва ихтилатраву кIицI лавгунни ниттил мазрал дарсирдал программа цIудуккан дан багьлай бушиву.
Ва конференциялий лакку мазрал дарсирдалмур секциялий ххалбивгьунни оьрчIан ниттил маз лахьхьин буллалийни хьунабакьайсса яла захIматми масъалартту. Шиккува кIицI лавгунни ниттил мазрайсса учебникру, методикалул ва наглядный пособияртту, ниттил мазрайсса литературалул луттирду чанну бушиву. Мукунма аьркинну бушиву вайннангу, уттизаманнул технологиярттайн бувну дузал бувсса, ниттил мазрал дарсру дишин ккаккан бувсса кабинетру. Конференциялий гьаз буллалисса масъаларттава ца яла агьаммур бия школарттай ниттил маз лахьхьин баврин ккаккан дурсса ссятру чан­сса душиврия рязий бакъасса.
КIулшиву дулаврил управлениялул зузалтрал, учительтурал даврил даража лавай бансса маслихIатругу ккавккун, махъ буллунни шикку гьаз бувсса цинявппагу масъалартту дузал баву мурадрай зун.