ЦIуминалийсса ТIюхчардал школалий Ниттил мазрал байран бусравсса хъамаллурайнгу оьвкуну, лахъа-хъунну ларгунни. Школалий ниттил мазрахсса къулагъас мудангу дур, ни­ттил мазрал байрангу шикку ца яла сий думур байран дур.Ниттил маз буруччаву, мунихсса ччаву чантI учин даву мурад­райсса давуртту, ниттил мазрал кьини дакъассагу, щаллагу шинал лажиндарай дуллай бур ЦIуссалакрал школарттай.
ТIюхчардал школалийгу ниттил мазрахсса къулагъас мудангу дур. Ниттил мазрал байрангу шикку ца яла сий думур байран дур. Гьашинугу ЦIуминалийсса ТIюхчардал школалий Ниттил мазрал байран бусравсса хъамаллурайнгу оьвкуну, лахъа-хъунну ларгунни.

Имара Саидова
Школалул залданул чIир­ттайн лархъун дия лакрал чичултрал ва шаэртурал суратру, лакку мазран хас бувсса чIирай дурну дия кказиттирттал, Дагъусттаннал чичулт­рал луттирдал выставка. Залдануву дирхьуну дия школалул оьрчIал ва учительтурал салкьи дурсса, хьхьичIара жула ичIура багьу-бизулуву ишла дуллай диркIсса кьай-кьуй. Байрандалийн бувкIсса учительталгу, дуклаки оьрчIругу нукIурасса лак­рал миллатрал яннардаву бия.
Байрандалул мажлис бачин бувну бия хъуними классирттал дуклаки оьрчIру. Ниттил мазрал байрандалий гьуртту хьун бувкIун бия Дагъусттаннал халкьуннал чичу Мирза Давыдов, Дагъусттаннал Чичултрал союзрал лакрал секциялул хъунама Илияс МахIаммадов, райондалул КIулшивуртту дулаврил управлениялул методист Мисиду Шагьмандарова.
Байран тIитIлай, ихтилат бувна ТIюхчардал школалул директор ЩайхахIмад Дадаевлул.
— Жула Дагъусттаннай 30-нния ливчусса мазру бур. Гьай-гьай, жунма оьрус маз чара бакъа аьркинссар, амма хьхьичIва-хьхьичI жунма жула ниттил маз кIулну бикIан аьркинссар. Ни­ттил маз къакIулсса инсан – му цала мархрая арх увцсса инсанни. Гьарица лаккучура тIисса инсаннан арулла никирайн бияннинсса цала мархри кIулну бикIан аьркинссар. Цайминнал дянив жула хIурматгу, сийгу дикIантIиссар, жунма жула мазгу, жула аьдатругу кIулссаксса, жучIава миннул кьимат буссаксса. На хъунмасса барчаллагьрай ура жула оьрчIан ниттил маз лахьхьаврих гъира бутлати­сса, цала даву лавайсса даражалий дуллалисса ттула учительтурайн: Алхулаева Гулназлуйн, Гулиева Дианайн, Апанниева Халункачардуйн, — увкуна директорнал.
— ОьрчIан цала ниттил маз лахьхьаврил дайдихьу кулпат­рава дан аьркинссар. Гьай-гьай, хъунмасса бияла буссар учительтурахьгу. Та оьвчирчангу, на ххарину учIара ва школалий дуллалисса мероприятиярттайн. Уттинингу цимилагу хьура на ва школалий. Хъунма­сса барчаллагь тIий ура байран хIадур дурсса учительтурахь, цаярагу, учительтураягу хъунна­сса тIалавшинна дусса школалул директор ЩайхахIмад Дадаевлухь, — увкуна Мирза Давыдовлул.
Муданма кунма, школалул учительтурал коллектив ва дуклаки оьрчIру ссавур дакъа ялугьлай бия Илияс МахIаммадовлул балайрттах. Ваналгу, цала назмурдугу дур­ккуну, балайрдугу увкуну, чIюлу бунни мажлис.
Ихтилатирттая махъ хъуними классирттал дуклаки оьрчIал був­ккуна ниттил мазрахасса шеърирду, увкуна лакку макьаннайсса балайрду, ккаккан бувна МухIуттин Чариновлул чивчусса «ХIажияв ва ХIавиват» тIисса драма.