Ккуллал шяраваллил библиотекалувун бавтIун бия Ниттил кьини хьунадакьин жямат, оьрчIащалсса ниттихъул, библиотекалул, администрациялул зузалт, дуклаки оьрчIру.
Шадлугъ тIиртIуна ХIажиева Аьйшал. Хъирив ихтилат бувна Маммаева Зоял. ХIусайнова Раисал (7-мур классрал дуклаки душ) барча бувна ниттихъул. Ниттихасса назмурду дурккуна Мутаева Шуаьнал, Акуева Сиянатлул, Ибрагьимова Марияннул, Кьаллаева Уммул, МахIаммадова Мадинал, ШайхахIмадова Анал. Вайва душварал увкуна ниттихъахасса балайрду («Милая мама», «Ккули душ», «Кавказ»). Ибрагьимова Марияннулгу ца ххуйну увкуна «Нину» тIисса балай. Махъва-махъгу цинявнналвагу щаллу бувна «Лакку кIану».
Ххуйну балайрду увкуна Аьлиева Саманиятлул, Аьлилов Аликлул, Аьлибагов Кьурбаннул, Алхасова Пазиратлул ва Аьлиева Саманиятлул. Хъирив 7-мур классрал душру бивзуна къавтIун, циллалусса къавтIаву дуруна ХIусайнова Раисал. АьвдурахIимова Сабриналгу барча бувна хъами Ниттил кьинилущал.
Махъ бавахъал къавтIавуртту дайдирхьуна. КъавтIий бия мюрщулт ва бугьарами.
Ас-намус буну оьрчIру тарбия буллан ниттихъахьхьун, жагьилминнахьхьун кьудрат дулуннав, дунияллий паракьатшиву хьуннав!
София Кьаллаева,
Ккуллал 2-мур школалул хъунмур вожатая
