Апрель зурул 19-нний Чапаевкаллал шяравусса «Солнышко» детсадраву хьунни оьрчIру школалийн хIадур баврил хIакъиравусса райондалул садикирттал тарбиячитурал ва байбихьулул школалул учительтурал цачIусса семинар.

Семинарданул сиптачи хьунни «Солнышко» детсадрал заведующая Оксана Исмяилова.
Шикку гьаз бунни садикир_ттал оьрчIру школалийн хIадур баврил, детсадирттал ва школалул дахIаву цIакь даврил, оьрчIан кIулшивуртту дулаврил масъаларттаха цачIу зузаврил ва му даву цIудуккан даврил масъалартту. Семинарданий гьуртту хьунни «Солнышко» садикрал зузалт, Чапаевкаллал №2 школалул байбихьулул классирттал дуклаки оьрчIру ва директор Камил АхIмадов, цIуминалийсса ЦIуссачIурттащиял школалул директор Жангиши Адамов, ТIюхчардал школалул директор ШайхахIмад Дадаев, ЦIуссалакрал ва Гьамиящиял школардал вакилтал, КIулшиву дулаврил управлениялул зузалт Мисиду Шагьмандарова ва Аминат Ибрагьимова.
Ва мероприятиялий гьур­тту хьун ва цалва коллегахъащал опыт кIибачIин мукунма бувкIун бия ЦIуссалакрал ва ЦIуссачIурттащиял шяраваллавусса садикирттал зузалт ва каялувчитал.
Семинарданул программа мюнпат бусса, авадансса дия. Шикку гьуртту хьун бувкIминнал ххал дунни хIадур бай группалувусса, мукунма дянивмур ва хъуними группардавусса занятияртту. Миннал лавайсса кьимат бивщунни опыт бусса тарбиячи И. А. Рамазановал даврин, ххуй чулий кIицI дунни чIирисса чIумул дянив оьрчIан азбука ва хIисавртту лахьхьин дан ва ми низамрайн вардиш бан бювхъусса жагьилсса тарбиячитал А. Султановал ва З. Буттаевал цIарду.
Семинарданул гьурттучитурал ххуйсса маслихIатру бунни тарбиячитурал даврил даража гьаз баву мурадрайсса. Гру­ппардавусса занятияртту къуртал хьуну махъ хIадур бай гру­ппалул ккаккан дунни концерт. Хъамаллурал кIицI лавгунни оьрчIаву музыкалух гъира бутаврих, вай му чулухунмай итххяххан баврих «Солнышко» садикрал музыкалул каялувчи Надира АхIмадовал хъуннасса къулагъас дуллай бушиву. Ва семинар хьуннин хьхьичIсса гьант­рай, оьрчIру школалийн цуксса хIадурну бурив кIул баву мурадрай, садикрал методистнал ва логопеднал ххал бувну бия хIадур бай группалул ва хъуними бусса группалул оьрчIру.
Ми ххалбигьавурттал хIа­силлая семинарданул гьур­ттучитурахь бувсунни методист А. Хаваевал, логопед А. ХIасанхIусайновал, психолог Г. Кьурбановал.
Миннах вичIигу дирхьуну, хъамаллурал бунни мюнпатсса маслихIатру.
Шикку хIукму хьунни май зурул ахирданий оьрчIру цал ттигу ххал бувну, хьхьичIмигу, махъмигу ккаккиярттал хIакъи-хIисав дан.
Семинарданий гьуртту хьуминнал лавайсса кьимат бивщунни хIадур бай группалуву­сса оьрчIал даражалун, миннал хIадуршиннаран.
Вайннал барчаллагь увкунни цалла даву лавайсса даражалий дуллалисса «Солнышко» садикрал заведующая Оксана Юсуповнахь ва садикрал коллективрахь.