ЦIуминалийсса ЦIуссачIурттащиял шяраву хьунни «Лакку билаят» кубокрахлу ччалаччисса футболданул турнир. Укунсса турнир райондалул спортрал тарихраву хьхьичIра-хьхьичI хъанай дур. Ванил сиптачитал хьунни «Гъази-Гъумучи» тIисса лакрал жяматийсса фонд ва ЦIуссалакрал райондалул администрация.
Турнир тIитIлатIисса шадлугърай гьурттушинна дан бувкIун бия ЦIуссалакрал райондалул бакIчи ХIажи Айдиев, ДР-лул БакIчинал ва ХIукуматрал кадрардал политикалул управлениялул хъунама Артур Исрапилов, ДР-лул Халкьуннал Мажлисрал депутат Зайнулла Мирзоев, «Гъази-Гъумучи» фондрал председатель АьвдурахIин Дибиров, ЦIуссачIурттащиял шяраваллил администрациялул бакIчинал хъиривчу Юсуп Аьлиев.
Турнир тIитIлай, ихтилат бунни ХIажи Айдиевлул. ХIажи Шихамировичлул кIицI лавгунни укунсса спортрал бяст-ччаллахь хъунмасса бияла бушиву шаннагу лакрал райондалул агьали, хаснува жагьилтал, лагма лаган бан, миннал дянив дусшиву цIакь дан.
Хъирив Артур Исрапиловлул барча бунни цинявппагу майданнив бавтIми ва хъуннасса агьамшиву дусса спортрал байрандалущал.
— Лакрал тарихраву чансса бакъассар миллатрал цIа бюхттул дурсса къучагъсса вирттал. ХIакьинугу буссар жула дянив сивсусса, кьянкьа-кьурчIисса жагьилтал. Умуд бур жулва вирттаврал наслуну бикIан лайкьсса, спортраву, элмулуву хьхьичIунсса, кIулшивурттугу, бюхъу-бажаргу бусса, миллатралгу, щалва Дагъусттанналгу цIа-кьини бюхттул дуллалисса инсантал хьунссар хIакьинусса жулва жагьилтурая тIисса, — увкунни Артур Исрапиловлул.
АьвдурахIин Дибировлул бувсунни «Гъази-Гъумучи» фондрая, ва бюхъу-бажар бусса жулва жагьилтал итххяххан баву, хьхьичIунмай баву мурадрай мунил дуллалисса давурттая. Мукунма ванал бувсунни фонд сакин дурминнал хIадур дурсса нацпроектирдая. Миннувасса ца хъанай дур ва турниргу. Турнир дуллан тIий бур гьарица шинах. Гьашинусса турнир хас дурну дур Хъунмасса Буттал КIанттул цIанийсса дяъвилий Ххувшаву ларсун 71 шин шаврин.
Турнирданий гьуртту хьун тIий дур 40 команда.
Бяст-ччаллу бикIан тIий бур гьарица нюжмардий, ххуллун ва алхIат кьинирдай. Финалданувун дагьсса командартту дурккун, бяст-ччаллал хIасиллу дантIиссар май зурул 1-нний.
Шиккува кIицI лаган, турнирданий гьуртту хьун бувкIми дукралул щаллу баврил масъала цала бакIрайн лавсунни ЦIуссалакрал райондалул администрациялул.
Лажин хIадур дурссар
А. Аьбдуллаевал
