Ккуллал райондалийсса 14-гу шяравух эстафеталул лагрулий бувккун, апрельданул 27-нний «Аьпалул лу» бувкIунни Ваччиял шяравун. Дурусну 2 барз хьуссар ва Лу шяраваллавух занай. Буниялагу хъинну жаваблувну хIадур дурну дия ва Лу тапшур ва кьамул баврил давуртту. Циняв школардал, оьрчIал багъирдал хIадур дурсса давуртту эбратрансса хьунни. Апрельданул 27-нний Вихьуллал шяраваллил вакилтал бувкIун бия Ваччиял шяраваллийн тапшур буван Аьпалул лу ва Ххувшаврил ттугълил копия.

БакIраяту Ваччиял шяраваллил школалул оьрчIал цIуку дянивсса венок бивхьуна дяъвилия зана къавхьуминнансса гьайкалданучIа. Агьаммур шадлугъ дайдирхьуна гьайкалданул хьхьичI. Ккуллал райондалул бакIчинал маслихIатчи ва пресс-секретарь Хизриев Шам­ххалал кIицI бувна цукунсса агьамшиву дуссарив ва даврил ялун нанисса ник тарбия давриву.
— Га никиран кIул хьуссар цукунсса захIматшивуртту ккарккун ларсъссарив жула буттахъал Ххувшаву. Мунил барану хъанахъиссар вана ва Берлиннал Рейхстаграй бивщусса ттугълил бунияласса копия. Ванил липI-липIлил бусласиссар жула чиваркIуннал ккурхIусса аьзав-аькьувардаяту. Уттигу жула лагма паракьатшиву дакъар. Мунийн бувнугу ялун нанисса ник тарбия дуллан жува, бугьарами, буржлувссару. Жулла дакIру кьянкьану духьурча, щищачIав цичIав буван къашайссар, — увкунни ванал.
Яла ванал махъ буллуна Ккуллал райондалул бакIчи Сулайманов Сяидлухьхьун.
— Ккуллал райондалия 2480 адамина дяъвилийн лавгун ур. Миннавату зана къавхьуну ур 1400-нния ливчусса. 28 миллион жулва инсантурал харж хьуну бур га дяъвилуву. Вай, учин бигьанугу, чансса инсантал бакъар. Ва жура дуллалисса даву эбрат­рансса хьуссар. Циван учирча, Ураллая, Дагъусттаннал районная оьвтIий бур, чагъарду букIлай бур администрациялийн, ва даву цукун дуллай буру, жухьгу бусияра тIий. БакIраяту, тIайламур бусан, на нава жагьжилну ияв, цукун хьувивав ва даву тIий. Гьарца шяраваллил бакI дургьуминнал ва школардал хъуннасса даву дурссар ва луттирайн лахъан дуван дяъвилий жанну дуллуминнал ва зана хьуминнал сияхI.
Ва дакъассагу, райондалий дурссар цаймигу ххуй-ххуйсса давурттив. Бувгьуссар ряхазаруннивун бивсса мурхьру. Бивщуссар Ххувшаврил ттугъ Щуну-Зунттул ца бакIрай. Дурссар райондалул циняв оьрчIал багъирдаву Ххувшаврил кьинилун хас дурсса байранну. Ваччавсса майданналул ялув дурну дузал шавай дур жула ххаллилсса Виричу АхIмад-Хан Султаннунсса гьайкал. ЧIяйннал шяравусса шанбачIулий дузал шавай дур ЦIаххуй Маккаевлунсса гьайкал. Бакьин буллай буру райондалул Досуговый центр. Тиккува бикIантIиссар Вирттаврал Аллея, — увкунни райондалул бакIчинал.
Махъру лавхъунни Вихьуллал шяраваллил бакIчи ХIусайнов МахIаммадлул, Вихьуллал школалул директор МахIаммадов Аьлиллул, Ваччиял шяраваллил бакIчи МахIаммадов Арсеннул, Ваччиял школалул директор Мирзаева Бажил.
Шадлугъравух гьуртту хъанай бия Ккуллал райондалул бакIчинал хъиривми ХIажиев Эдуард, Илиясова Сабрина, Соцзащиталул бакIчи Гъазиев Жамбулат, музейрал директор Абакаров ТIагьир, Вихьуллал, Ваччиял школардал учительтал, Ваччиял шяраваллил жямат ва райондалийсса идарар­ттал зузалт. Яла агьаммур даву ккаккан дурна Вихьуллал ва Ва­ччиял школардал оьрчIал. Вайннал хъинну асар биянну бувккунни дяъвилул шеърирду.
Ахирданий Вихьуллал школалул директор МахIаммадов Аьлиллул Аьпалул лу буллуна Ва­ччиял школалул директор Мирзаева Бажихьхьун.