ДР-лул БакIчи
В. А. Васильевлуйн
Лакрал райондалул бакIчи Ю. ХI. МахIаммадовлуйн

Жу, ГьунчIукьатIрал школалул учительтал, дуклаки оьрчIал нину-ппу, шяраваллил жямат, лабизлай буру зуйн, ва жул мурадирах къулагъас дувара тIий.
Жул школа бувссар 2000 шинал, ва бур анаварну батIайсса журалул школа (сборно-щитовой корпус). Ванил бур 8 къатта-класс, ца-цанний 35 квадрат мет­ралул лагру дусса, ца класс бур 17 квадрат метралул лагру дусса. Мунийн бувну школалий дарсру дихьлай буссар кIира сменалий. Жун багьунни дукра дай­сса ва дукайсса кIантту классир­ттал къатрая буван, мунийну чан бувну укунмагу биял бакъасса класс­ру. Къума-цIансса тагьарданий дуллай буру школалий дуван аьркинсса давуртту: класс­равун лаглай бакъар ацIвахъул оьрчIру, миннал нину-ппу, учительтал. Утти чара бакъа тIалав буллай бур школалий личIи буван гъилисса туалетругу, медициналул кабинетругу.
ДР-лул БакIчи В. А. Васильевлул сипталийну цIана бюхълай бур дузал буван мукунсса масъалартту. Дузрайн дуккан дуллай бур «150 школа» тIисса проект. Жул шяраваллил жямат­рал кьамул дунни му проектрал шартIру ва жу хIадурну буру 500 азарда къурушрайнусса кумаг буван школа цIу буккан баврил ххуллий. Райондалул муниципалитетрал личIи дан бакIрайн ларсунни 200 азарда къуруш. Ми арцугу, ДР-лул субсидияр­ттал 2 млн. къурушралгу хIала дичаврицIун бюхъанссия ца сменалий дарсру дихьлан, школа цIу буккан буван, дуккаврил давурттан къулайсса шартIру дузал дуван.
Жул хъунмасса тавакъюри жул школагу лахъан буван ми 150 школалул сияхIрайн.
Школалул учительтуралгу, дуклаки оьрчIалгу, нитти-бутталгу чулухату барчаллагь тIий бур Лакрал райондалул бакIчи Ю. ХI. МахIаммадовлухь, шяраваллил бакIчи М. Х. Штанчаевлухь, щарнил жяматрахь «150 школа» тIисса проектран арцуйнусса кумаг баврихлу.