[dropcap]О[/dropcap]ктябрь зурул 27-нний МахIачкъалалив, Оьруснал театрдануву, паччахIлугърал ва жяматрал ишккакку Жалалуттин Къоркъмасовлул 140 шинал юбилей дунни

П. Рамазанова
[dropcap]М[/dropcap]икку гьуртту хьунни, ХIукуматрал председательнал къуллугъ чIумуйну биттур буллалисса Аьбдуссамад ХIамидовлуя тIайла хьуну, министерстварттал вакилтал, культуралул зузалт. ХIукуматрал хъунаманал хъиривманал бурж чIумуйну биттур буллалисса Анатолий Карибовлул кIицI лавгунни Къоркъмасовлул Дагъусттаннал тарихраву агьамсса кIану бувгьушиву, революционертурал мархлуцIакул Дагъусттаннал кьадар баххана бувшиву, гьамин Жалалуттин Асельдеровичлул сипталийну хIасул бувшиву Дагъусттаннал социалистътурал группа. Бувсунни Къоркъмасовлул каялувшиву дуллалисса му группалуву бивкIшиву цIанихсса революционертал: Дахадаев, ХIабиев, Хизроев, Тахо-Годи ва му цувагу. Бувсунни му мудан хъунаману увчIайсса ивкIшиву, куртIсса ва цIакьсса кIулшивуртту дусса, бюхъу ххи­сса унутIий. Жалалуттин Къоркъмасовлул цIанийсса фондрал хъунама ХIусайн Аьдиловлулгу кIицI лавгунни паччахIлугърал система хIисаврайсса Дагъусттаннал гьану бивзшиву Къоркъмасовлул ва мунал уртакьтурал, революциялул гьулусансса шиннардий школарду, медпунктру, театрду буллай, ми агьалинан ххуй­сса оьрму дузал банмуних луглай бивкIшиву. «Къоркъмасовлул мурад бивкIссар европанал билаятирттайнияр къалув­сса оьр­му Дагъусттаннайгу баву, цащава шаймургу бувссар ххуйсса оьрму хIасул баврил цIаний. На хъинну рязийну ура хIакьину, щапI куну бувцIусса зал чIалай. Ва иширавагу исватну чIалай бур агьалинал, хаснува жагьилтурал, лавгзаманнул тарихрал хIурмат бушиву», — увкунни Аьдиловлул. Къоркъмасовлул яргсса оьр­мулул ххуллия бувсунни РАН ДНЦ-лул вакил, элмурдал доктор Мирзабаг Мирзабаговлул, кьатIаллил иширтталсса буллалисса Аьрасатнал министерствалул МахIачкъалаливсса вакил Амирхан МахIаммаддадаевлул ва цайминнал.
Юбилейрал мероприятияр­ттай гьуртту хьун Дагъусттаннайн увкIунни Москавлив яхъана­хъисса Анатолий Къоркъмасов, ттаттал цIа хIурматрай ядуллалисса варис.
Ва кьини театрдануву кка­ккан дунни хъуннасса концертгу.