Лавгмур номерданий жу бувсъссия бярув оькьлакьисса 4 шинавусса оьрчI ххассалгу увну, мунан цалчинсса кумаг баврихлу Гъумучиял школалул дуклаки душру Садикьова Аида ва Муслимова Аминат Аьрасатнал МЧС-рал Дагъусттанналмур управлениялул «Созвездие мужества» наградалун ккаккан бувну бушиву.
Нюжмар кьини Лакрал райондалул бакIчинал кабинетравун бавтIун бия администрациялул зузалт, къучагъсса душварахь ва вайннал нитти-буттахъахь барчаллагь учин.
Аидан ва Аминатлун барчаллагьрал чагъарду ва арцуйнусса бахшишругу дуллуну, Юсуп МахIаммадовлул барчаллагь увкуна душварал нитти-буттахъахь. «Вай мюрщисса душварал тIулул ккаккан дурссар хьхьичIра-хьхьичI цала нитти-буттахъал тарбия, школалий ОБЖ-лул дарсру лавайсса даражалий дихьлай бушиву, администрациялул пишакартурал хар-хавар бакъасса иширттаву чаранну лякъин вардиш буллалисса давугу сантирайн дагьну душиву», — увкунни ванал.
