Июльданул 25-нний Ваччав, Вирттаврал аллеялий, Дагъус­ттаннал Конституциялул кьинилун хас дурсса шадлугъ хьунни, райондалул идарарттал каялувчиталгу, жяматрал вакилталгу гьурттуну. Ва хIадур дурну дия Райондалул культуралул центр­данул.

Лакрал райондалул администрациялий хьунни Да­гъусттаннал Конституциялул кьинилун хас дурсса шадлугъ.

Зулайхат Тахакьаева
Байран барча тIий, райондалул бакIчи Юсуп МахIаммадовлул кIицI лавгунни Дагъусттан Республикалул Конституция кьамул дурну диркIшиву СССР ппив хьуну махъсса ччанавккусса, паччахIлугъ жапасса ххуллул шанбачIулий дарцIусса ппурттуву.

– ЦIусса Конституция кьамул баву хьуссар республикалул тарихрал цIусса этапну. Конституциялул цIакь бувссар Да­гъусттаннал халкьуннал цIакьсса хIучча Аьрасатнал Федерациялул ца бутIа хIисаврай, Дагъус­ттаннал цашиву дуруччинсса.

Ва бигьа дакъасса чIумал жува бикIан аьркинссару ттининнияргу кьянкьану, жапасса мурадру биттур буллалисса жула аьралитурал чIарав бацIан бюхъансса куццуй. Зана хьуннав цив сагъну-саламатну цала кулпатирттал ялун, цайва бивхьусса буржгу лайкьну лавхъун, – увкуна Юсуп МахIаммадовлул.
Байрандалул тарихрая бувсуна Шяпи Шурпаевлул.

ДР-лул Халкьуннал Мажлисрал Лакрал райондалул жяматрал чулухасса депутат Марат Илиясовлул кIицI лавгуна Да­гъусттаннал Конституциялул жула миллатругу цачIун буллай, аьдатругу дуручлай душиву.
Аьрасатнал жагьилтурал ва оьрчIал «Движение Первых» тIисса суккушиндарал ватан ххирану тарбия баврил ххуллий дуллалисса мероприятиярттал лагрулий Юсуп МахIаммадовлул ва Марат Илиясовлул оьрмулул 14 шин бартларгсса дуклаки оьрчIан буллуна паспортру. Муния махъ райондалул магьирлугърал зузалтрал ккаккан дурна концерт.