Ккуллал школалун 90 шин шаврийн
Гьашину, 2019-ку шинал, Ккуллал 1-мур дянивмур даражалул школалун там хъанай дур 90 шин. ХIадургу хъанай бур гьарза-гьартану кIицI лаган ва юбилей.
Школа тIивтIуну бивкIун бур 1929-ку шинал. Муниннин микку бивкIун бур 1924-ку шинал тIивтIусса байбихьулул школа, амма школалун тIий дурсса хасъсса къатри къадиркIун дур. Мунияту 1929-ку шинал, школалунма тIий, хIукуматрал 4 къатта бувну бур.
Ккуллал школа мудангу хьхьичIунминнувух бивкIссар, бугу-буссар, бикIангутIиссар.
Ва школалул юбилей кIицI лаглагисса бавукун, цума-цагу ккуличунал дакIнивун гъилисса гьавас буххан бюхъайссар, цанчирча, ваницIун бавхIусса буну тIий цума-цагу ккуличунал биографиялул биялсса бутIа.
Гьашину, Ккуллал 1-мур школалул юбилей дакъассагу, ялагу дуссар тамансса юбилейрду. Учиннуча, школа къуртал бувминналгу дикIантIиссар цала-цала юбилейрду. Мукунсса ца выпускрал юбилейрая бусан ччай бура нагу. Жулмур выпускран гьашину хъанай дур 45 шин.
Лавгру хIадур бай классравун 1963-ку шинал, бухьунссия ца 100-120 оьрчI ва душ. Буссия 4 класс. Жул класс бия «А», цуппагу хъинну ххуйсса, оьрмулухун дакIний ливчIсса учительгу уссия жул – Айдамиров Аьвдулхаликь (аьпа баннав цал). «Б» классрал учительница буссия Амираьлиева Саидат, «В» классрал учитель – Щамхалов Аьбдул, «Г» классрал учитель – Зирбуев Ирбагьин, вай кIиягу аьпалувух хьунни.
Къуртал барду школа 1974-ку шинал 48 оьрчIал ва душнил, ттуршунниха ливчусса оьрчIру 10-мур классравун къабивуна. ЧIявуминнал 8 класс бувккуну кьабивтуна, кувгу дуклан шагьрурдайн лавгуна ва 9-мур классравун занан къабивкIуна. Мукун жу къуртал барду школа ва гьарцаннал хьхьичI бавцIуна циру тти зунтIисса тIисса суал. Утти жу нитти-буттал канила буклай бияв. Му 1974-ку шинал жул школа хIисав бан бучIия республикалий ца яла хъунмасса школалун. Му шинал сентябрьданул цанний жул школалий ккалан лавгссия 170-нниха ливчусса оьрчIру. ДиркIссар къумашиву классирттал. Мунияту хIукму хьуссар шяраву ца цамургу школа тIитIин – цIанасса 2-мур школа. Ккуллал «Хъун» школалиягу хьуссар 1-мур школа.
Мукун «1-мур школа» тIисса цIа дирзунгу хъанай дур 45 шин. ХIисав бувсса чIумал, 2-мур школалун хъанай дур 45.
ХIакьинусса кьини жул выпускрал оьрчIру ххялтIа бувккун бур. Миннава кув ччянива ахиратрахьхьун лавгунни, кувгу – махъсса шиннардий. МукьцIаллий ххюра шингу чIивисса оьрму бакъар. Бюхъай цаппараннан цащалва ккалай бивкIсса оьрчIру ца бивкIссаривгума хъамабивтун бикIан.
На ва ттула макьалалуву бакIра-бакIрах кIицI дан ччай бура ттущала «а» классраву дуклай бивкIсса оьрчIал ва душварал цIарду: Аскандаров Агъа, Исякьов Аскандар, Исякьов МахIмуд, Кьурбанов Кьурбан, Маммаев Кьурбан, Рамазанов Русттан, МахIадов ХIасанбаг, Пирузиев Рашид, Аьллаева (Оьмариева) ПатIимат, Аьлибекова (МахIаммадова) Зина, Къаяева (Къянчиева) Сурая, Халилова ТIагьират, МахIадова(Айдамирова) Аминат, Оьмарова(АхIмадова) Сиянат.
Цуксса хIайпнугу, тамансса оьрчIру жагьилнува яла лавгунни, вайнналгу аьпа баннав: Оьмаров АхIма, Разуев ОьмархIажи, Оьмариев Оьмари, МахIаммадов Кьадир, Сулайманов Руслан, МахIаммадов ХIажимурад, Кьадинаев Гьарун. Цибанссар, чичрулун чаран бакъар.
Умуд бур ва жулмур классрал оьрчIалгу, тамур классрал щала выпускралгу гьашину гъинттул юбилей кIицI лагаврий хьунабакьаву хьунссар тIисса. На оьвтIийгу бура цинявннайн, бувкIун буттал миналийн, кувннащал кув хьунабакьин.
Нагу зуйн цинявннайн икрамрайсса Гугьарша Далиева