Декабрь зурул 19-нний ЦIуссалакрал райондалул администрациялул бакIчи ХIажи Айдиевлул дунни райондалул щархъал администрациярттал хъуниминнащал, заместительтуращал, идарарттал ва организациярдал каялувчитуращалсса ирглийсса совещание.
Совещаниялул даврил дайдихьулий ХIажи Шихамировичлул барча унни Банайюрт шяраваллил администрациялул бакIчину цIуну увчIусса Ю. Ибрагьимов.
Хъирив райондалул бакIчинал лавайсса кьимат бивщунни мюхчаншиву дуруччаврил масъаларттаха зузисса цала заместитель Гъаирбаг Мусаевлул бивхьусса захIматран ва ЦIуссалакрал райондалул администрациялул АТК-лул аппаратрал дурсса агьамсса давурттан. Мукунма ХIажи Айдиевлул бувсунни ларгсса нюжмардий райондалийн бувкIун бивкIсса Республикалул АТК-лул ва НАК-рал вакилтурал делегациялул дурсса ххал бигьавурттал Райондалул АТК-лул даврия рязийну ливчIшиву ва мунил даврин лайкьсса кьимат бивщушиву.
Совещаниелий райондалул бакIчинал барчаллагь увкунни доходру дучIан даврил даву 100% биттур дурсса шяраваллал бакIчитурахь. Ванал бувсунни агьалиная налогру датIаврил давриву яла лахъми ккаккияртту дуршиву «Ямансу» МО-рал, аьрщарал налогру датIаврил давриву Аьхъардал шяраваллил.
ХIажи Шихамировичлул совещаниелий бувсунни ЦIуссалакрал райондалий, яни Новостройрай тарихрал музей бувансса хIукму бувну бушиву.
«Буниялагу авадансса тарих буссар ЦIуссалакрал райондалул, жула агьалинал. Мунияту жулва цинявнналвагу бурж хъанахъиссар, му тарих ирсирая ирсирай яхьуншиврул буруччинсса даву дуван», — увкунни ХIажи Шихамировичлул.
Совещаниялул ахирданий бакIчинал бувсунни хIасул бувну бушиву ЦIусса шинал байрандалийнсса хIадуршиннардаха зунтIисса оргкомитет. Мунийн бувну шяраваллал администрациярдал бакIчитурайн ва идарарттал каялувчитурайн бунни хасъсса амрурду.
