Бигьалагай кьини Лакрал райондалий дуклаки оьрчIал ва жагьилтурал дянив хьунни ДР-лул ХIукуматрал хъунаманал маслихIатчи Жяъпар Абуевлул завалунсса футболданул минитурнир. Му хьунни Гъумучиял паркраву цIуну бувсса футболданул майданнив.
Ва мероприятиялул сакиншинначиталну бувккунни кандидатнал чIарахбацIулул штаб, «Единая Россия» партиялул кIанттул отделение, райондалул администрациялул спорткомитетрал хьхьичIунсса пишакар Малик ХIусманов, ДЮСШ-лул директор Шарабуттин Ханов.
Турнирданий гьуртту хьунни 14 команда – 8 команда – дуклаки оьрчIал, 6 – жагьилтурал.
Дайдирхьуна турнир оьрчIал бяст-ччаллия. Бяст-ччал кIура бавуна спортрал байрандалийн.
Ххув хьусса командарттан буллунни дипломру, арцуйнусса бахшишру, спортрал инвентарь. ТIуркIулуву хьхьичIунну бувксса спортсментуран дуллунни хасъсса призру.
Турнирданий гьуртту хъанахъими, миннахлу буклакими ва тамашачитал барчаллагьрай бия Жяъпар Абуевлуйн, чIа тIий бия муннансса тIайлабацIу.
