ЗахIматшивуртту циксса духьурчагу, жулва дянив чан ба­къар цалва оьрму, чIявучин хъинбала-хъиншивуртту дуллай, иш багьни, чIарав бацIлай, цаманан кумаг баву цанмасса талихI-тирххандаран ккалли буллалисса инсантал. Мукунминнаятусса цану на ккалли бавияв ГьунчIукьатIралгу, Читтурдалгу душ, лак­рал хъаннил «Дараччи» клубрал каялувчи Илиясова Мариян. Ванил дурмуния, дуллалимуния ттинин чансса къачивчунни. Цуксса тикрал хъанай чIалай бухьурчагу, бикIувча миннуцIун ва хъун бакъасса ттулмургу махъ. ЧIаланххурав ххишалану?

Сайки 20 шин шавай дур «Дараччи» клубрал. Му чIумул мутталий ва клубраща бювхъунни чIярусса ххуй-ххуйсса давур­ттив дуван. Къаша-шайну, хъирив буккан каши дакъа, ялгъуз-гъаривну ливчIминнан ка-кумаг буллай, чIарав бацIлацIаву да­къассагу, ва клубрал цилва агьам­сса мурадну хIисав буллай бур жулва миллат, лакку маз, ппухълунная ирсирай нанисса мюнпатми аьдат-эбадатру, культура цIудуккан даву, ми оьрмулуву цIакь даву, лакрал театрданул, кказитрал, журналданул чIарах бацIаву, школарттан, библиотекардан ка-кумаг баву. Марияннул сипталийну Лаккуй дацIан дурунни ПартIу ПатIимал гьайкал, бунни зиярат, буккан бунни ххуй-ххуйсса луттирду.
Ттун хъамакъабитай нава лак­рал радиолий зузисса чIумал Мариян ва ванил клубрал уртакьтал жучIан ссайгъатирттащал бучIайсса бивкIсса. ХIукуматрал къулагъас чанну душиврийн бувну, жул кабинетру ххуй дакъасса тагьарданий бушиву чIалай, ми цалва харжлугърах ремонт баврищал, мивунсса мебельгума «Дараччи» клубрал ларсуна. Ва так ца чIивисса мисалли.
ДакIния къабуккай ца цамур затгу. Нава пенсиялийгу уну, ттула ичIаллил иширттацIун бавхIуну, на уссияв даву кьаритан ччай. КIилва аьрза буллуну бунува, къаитаакьлай ивкIун, ахиргу, хъуниминнал на, дакIний личIансса тагьарданийсса мажлисгу бувну, хъунмасса хIурматрай тIайла увккунав. Муния махъ ца кьини ттуйн телефондалувух оьвкуна. ОьвтIий бия Мариян, цичIана ухьхьу тIий.
«Цан оьвтIий бурвав? Ва ттулва тяй-туш ягу личIину хIала-гьурттушиву дусса хъамитайпа бакъархха?» — тIий ура ттухьва нава. Лавгунна ккаккан дур­сса чIумуй. Хьунаавкьунна, ччя­нияцIа цищала дусъсса инсан куна, дакIнийхтуну, ххарину.
— Гьарун, на чансса къаччан бивкIун буссара вийн. Циван чирча, ина кIа даврий аьркин­сса инсан ияв. НахIакь ливхъунна. КIилчингу, инава тIайла уклакисса мажлисрайн ттуйн къаоьвкунни.
Бусав кIа мажлис ттунмавагу хавар бакъанма сакин бувну бивкIшиву ва даву циван кьадитан багьлай бивкIссарив.
ХIасил, жул дянивсса хIа­лимсса ихтилат мадара лахъи лавгуна. Ахирданийгу, Марияннул на тIайла увккунав ттунма ва ттулва аьзизсса кулпатрангума дакIний личIансса ссайгъат-бахшишращал. Укунсса даву тIурча, ччиманал ччиманан къадайссар тIиссара.
Мариян Дагъусттан Респуб­ликалул ва Аьрасатнал Федерациялул культуралул лайкь хьу­сса зузала, ПаччахIлугърал театрданул искусствалул ва кинорал иширттаву 1999-ку шинал­сса лауреат, ДР-лул халкьуннан кIулшиву дулаврил отличник бур. Ванил дурмунин лавайсса кьимат бишлай, «Дараччи» клуб­рал офисраву чIирттайн лархъсса хIурматрал грамотарттал, барчаллагьрал чагъардал ккал дан захIмат хьунссар.
«Серебряный голубь» клубрал председатель Елена Голубевал цилва чулуха Марияннул юбилей барча дуллалисса ца чагъарданий бур укунсса ххару (ласунну оьрус мазрайва). «…Вся твоя жизнь является ярким примером предназначения роли женщины в современном мире. достойная супруга, красивая женщина, всеобъемлющая доброта, представительность и действенность, принципиальность и исполнительность, способность уважать позиции других, гражданская ответственность и душевная щедрость – вот присущие Вам качества, которые достойны уважения всех…».
Мяйжаннугу, тIайлар, хъинну тIайлар ванил тIутIимур. Циксса бухьунссар ва чумартсса хъамитайпалийн дакIнийхтуну барчаллагьрайсса.
Мариян дурмуний гьашиву дурну, гьархха тти куну, бацIай­мургу бакъар. Ялунгума лавай­сса гъираращал давур­тталсса буллайнма, ци дуван дурив кIул буллайнма бур. Ххишалдаран, «Дараччи» клубравун жагьилсса, пагьму-гьунар бусса хъами-душру кьамул бувну, клуб цIубу­ккан бунни.
НахIакь бакъархха чIяву­миннал ванийн лавайсса хIур­матрай «Жулва Мариян» тIу­тIисса. Укунсса хIурматгу лайкь бан аьркинссар.
ХIурмат лавайсса Мариян! Ина уттинин дурмур ва дуллалимур винна ва вилацириннангу барачатну зана хьуннав, цинявнная цадакьану хьуннав, ина мукунма, буххаву къакIулну, зун бюхълайнма личIаннав, оьрмулул буччиннин битаннав!
Нагу вил дуаьчи
Гьарун ХIасанов,
ш. Ккул