Ккуллал райондалий мартрал 10-нний Украиннайсса хасъсса аьралий операциялуву ва Сириянаву жанну дуллусса шама аьраличунал аьпа абад бунни. Аьпалул ултти цIакь дунни Ккуллал 2-мур школалул чIирай. Аьралитал цивппагу дуклай бивкIун бур ва школалий. Вай шамунналагу – Чаннанов МахIмуд Маликлул арснал, Атаев Заурбек Аьлиллул арснал, Магьдиев Мурад Халидлул арснал, ватандалул цайва бивхьусса бурж биттур буллай, жанну дуллуссар.Аьралитурал аьпа абад буллалисса батIаврий гьурттушинна дунни райондалул администрациялул бакIчи Шамил Рамазановлул, Лакрал ва Ккуллал районнал военкомнал буржру щаллу буллали­сса Шималин Вагьабовлул, райондалул идарарттал зузалтрал, гъан-маччанал, дуклаки оьрчIал.
– Вайннал кьамул бувссар вирттаврал бивкIу, ккаккан дурссар ялун нанисса никиран патриотшиврул ва къучагъшиврул эбрат, лайкьну биттур бувссар инсаннал ва аьраличунал бурж, – увкуна майор Щамхал Хизриевлул.
БатIаврий дуклаки оьрчIал дурккуна аьралитуран хас дур­сса назмурду ва декламацияртту. Махъру лавхъуна аьралитурал гъан-маччанал ва цайминнал.
– Ттул арс хъинну цаятура­сса жаваблувшиву хъуннасса, дакI хъинсса, цума-цанналгу чIарав ацIайсса ия. Ванал дунияллийсса паракьатшиврухлу ва дакьаврихлу жан дуллуссар. Ванаща цамур ккуццуйсса бивкIу кьамул бангу къахьунтIиссия. Ва талай уссия Сирия террористътураща мурахас буллалисса иширттаву ва Украиннавусса хасъсса аьралий операциялий. На ваная пахрулий ура, – увкуна Заурбек Атаевлул буттал Амучил. Заурбек Атаевлул жан дуллуссар Сириянал агьали террористътурая мурахас буллалисса операциялуву.
МахIмуд Чаннанов – ванан дурагу 21 шин диркIун дур. Жагьил дахьа армиялиягу увкIун, контракт чирчуну, лавгун ур ДНР ва ЛНР неонацистътурая тархъан буван. Жан дуллуну дур мартрал 8-нний 2022 шинал. Мурад Магьдиев къуллугъ буллай ивкIун ур Хьхьирил пехоталул 49-мур бригадалуву. Декабрь зуруй 2022 шинал гьуртту хьуну ур СВО-раву. Январьданул 25-нний 2023 шинал жан дуллуну дур.
Хъирив махъ лавхъуна райондалул администрациялул бакIчи Шамил Рамазановлул:
– Гьарцагу чIумул цила вирттал бикIайссар. Виричушиву тIурча, гьар чIумалгу диркIссар бюхттулшиврий. Жула аьралитурал дурсса къучагъшиврулгу вай гьаз бувссар лавайсса рув­хIанийсса шачIанттайн, инсаншиврул бутIа ххину-ххишалану бивкIун тIий вайннаву. Жунмарив аьпалуя гъалгъа тIун захIматри, жагьилминналмуния хъиннува. Вайннал дурсса тIул – мяйжаннугусса арамтурал дай­сса тIулли. Вай патриотшиврул ва цIакьшиврул абадлийсса эбратруну личIантIиссар. ХIакьину жула вирттаврал аьпалул ултти лархъссар мува куццуй виричуну жан дуллусса ХIамзат Даххаевлул цIанийсса школалул чIирайнгу. КIулли вай аьралитурал нитти­хъал дардирдал дазу дакъашиву. Цукунсса мукъурттийри вайннал дакIру паракьат дан шайсса? Жу зул хьхьичI никру ришлашиссару, – увкуна райондалул бакIчинал.
Аьпалул ултти лархъсса школалул чIирацI дирхьуна тIутIив. Ккуллал райондалул имам Му­хIаммад-Маннар БариевлуцIун бавтIцириннал дуаьгу дурну, пахъ багьуна ца минутIрайсса.