Ватан дуруччултрал байрандалул гьантрай аьдатравун багьсса куццуй Аьрасатнал президентначIасса Дагъусттаннал вакилханалий бавтIун бия Ватандалуха къуллугъ баврил ва мунил мюхчаншиву дуруччаврил пиша язи бувгьуми. Дагъусттаннал вакилханалул хъунаманал хъиривчу Табир Маликовлул барча бунни циняв Аьрасатнал ПрезидентначIасса Дагъусттаннал вакил Владислав Толстюклул цIания.

«ХIурмат бусса ватанлувтал. 23-мур февральданул кьини – ляличIисса байранни. Гьарицагу чIумал инсантуран пахру бивкIссар Ватандалийн тIай­ласса, Ватан дуручлачисса арсурваврая – къучагъсса аьралитурая. ХIакьину жува барча буллай буру цинявппагу ва ххуллу язи бувгьуну, цала къуллугърал бурж лайкьну бартбигьлами. ДакIнийн бутлай буру цал агьаммур мурад билаятрал цашиву, паччахIлугърал ва цала халкьуннал мюхчаншиву дуруччаву хъанахъисса кьянкьасса, сивсусса жула арсру», – увкунни ванал.
Шадлугърал мероприятиялий ДР-лул лайкь хьусса артист Марио Али Сутуевлул щаллу бунни «Кьурукьру», «Махъра-махъсса талатаву» балайрду. Калимат Лукьмановал ва Лайла БахIандовал бувккунни В. Лебедев-Кумачлул, Константин Симоновлул ва Расул ХIамзатовлул чивчусса Ватандалухасса шеърирду. «ЛиКаНа» ансамбльданул ккаккан дунни къавтIавуртту.