Ватан дуруччултрал кьинилун хасну Ккурккуллал школалий хьунни уттигъанну аьралий къуллугъ бартбивгьуну зана хьусса, хасъсса аьралий операциялуву гьуртту хьусса шяравучу, Салманнул арс ДинмахIаммад МахIаммадовлущалсса хьунабакьаву. Аьраличу лахъа-хъунну хьунаакьин ххуйну хIадур хьуну бия дуклаки оьрчIру ва учительтал. Класс чIюлу бувну бия Буттал кIанттул цIанийсса Хъунмасса дяъвилул Вирттаврал суратирттал. Дурну дия Виричу цIа лайкь дурсса шагьрурдал стенд. ТIиртIуну дия дяъвилиясса луттирдал выставка.
Лархъун дия хасъсса аьралий операциялуву къучагъшиврий жанну дуллусса лакрал вирттаврал сияхI. Мукунма классрал чIирттайн лавхъун бия Ватандалухасса, патриотизмалухасса махъру.
Ккурккуллал школалий оьрчIру Ватан ххирану тарбия баврих мудангу ххишаласса къулагъас дуссар.
Мероприятие тIитIлай, ихтилат бунни ванил сакиншинначи, оьрус мазрал ва литературалул учитель Гульнара Магьдиевал. Ванил бувсунни ДинмахIаммадлуя, барчаллагь увкунни ванал нитти-буттахь. Бувсунни ва тарбия авриву хъунмасса захIмат бивхьусса бава-ттаттая. ДинмахIаммад цала ппу Салман куна сивсусса, кьянкьасса, спортрал чулуха итххявхсса жагьил ур. Аьралий буржгу ванал лажин кIялану бартбивгьуну бур.
Лайкь хьуну ур Обороналул Министерствалул чулухасса Барчаллагьрал чагъарданун.
ОьрчIал суаллахьхьун жавабру дуллай, ДинмахIаммадлул кIицI лавгунни аьралий къуллугъ гьарицагу жагьилнал лахъан аьркинсса бурж бушиву, бувсунни Дагъусттаннал жагьилтурал чувшиврия, яхIирая. Бунни мюнпатсса насихIатру.
Дуклаки оьрчIал бувккунни шеърирду, увкунни балайрду.
Ахирданий учительтуралгу, дуклаки оьрчIалгу ДинмахIаммадлущал дакIний личIансса суратру рирщунни.
